Ciyaartoyda xulka qaranka England ayaa taxadar badan samayn doona galabta, kaddib markii garsooraha aan jixinjixa lahayn ee Raphael Claus oo u dhashay Brazil loo dhiibay kulanka adag ee Iran vs England ee ay xiisihiisa sare usii qaadeen xurgufta siyaasadeed ee sannadaha badan u dhaxaysay labadan dal iyo mid cusub oo Ingiriisku hadda dabada ka riixayo oo ah ololaha ay xuquuqda ugu raadinayaan qowmu-luudka.
Raphael Claus oo ay tahay markii koowaad ee uu Koobka Adduunka kulamo ka qabanayo, waa garsoore khibrad badan leh oo sidoo kalena ciyaaro adag oo Copa America ah hayay sannadkii hore ee 2021, gaar ahaan ciyaartii kaalinta saddexaad ee Colombia iyo Peru.
43 jirkan ayaa sidoo kale ka mid ahaa garsooreyaashii ay FIFA usoo xushay koobkii adduunka ee U20, waxaana uu hadda ka mid yahay labada garsoore ee reer Brazil ee ku sugan Qatar oo dhexdhexaadinaya kulamada Koobka Adduunka. Garsooraha kale waa Wilton Sampaio.
24kii ciyaarood ee xilli ciyaareedkan, waxa uu sidoo kale bixiyey 10 kaadh oo casaan ah, waxaana layaab lahayd inuu kulankii Fluminense vs Flamengo uu siddeed ciyaartoy casaan siiyey. Shan ka mid ah waxay ka tirsanaayeen Fluminense iyo saddex kale oo u ciyaarayay Flamengo.
Ciyaarta xamaasadda badan ee maanta ee Iran iyo England ayaa uu garsoore Raphael Claus uu kasoo muuqan doonaa, waxaana la filayaa inuu kaadh waqti horeba u taago kabtanka xulka qaranka England ee Harry Kane haddii uu garoonka lasoo galo calaamadda qowmu-luudka.
