Tababaraha xulka qaranka England ee Gareth Southgate ayaa bixiyey marmarsiiyo ka yaabiyey taageereyaasha kubadda cagta mar la weydiiyey sababta uu u ciyaarsiin waayey laacibka da’da yar ee Phil Foden kulankii Maraykanka ay barbarraha goolal la’aanta ah la galeen Jimcihii.
Three Lions oo hoggaaminaysa Group B ayaa u baahnayd inay guuleystaan, si ay ugu gudbaan wareegga 16ka, hase yeeshee nasiib ayay lahaayeen haddii ay ciyaartu kaga dhamaatay iyaga oo dhibic haysta, sababtoo ah aad ayaa looga fiicnaa, waxaanay Maraykanku iska khasaariyeen fursado wanaagsan.
Tababare Gareth Southgate ayaa sameeyey saddex beddel ciyaartii Maraykanka, waxaana uu qaybtii dambe keenay Jordan Henderson, Jack Grealish iyo Marcus Rashford, isaga oo saaray Jude Bellingham, Raheem Sterling iyo Bukayo Saka.
Phil Foden ayaa ku dhamaystay kursiga kaydka, waxaanay arrintaasi u cuntami weyday taageereyaasha xulka qaranka dalkaas sababtoo ah Foden waxa uu xilli ciyaareedkan u dhaliyey Man City siddeed gool, waxaana uu sameeyey fursado fiican oo kale.
Southgate oo saxaafadda kula hadlayey gudaha garoonka Al Rayt Stadium kaddib ciyaartii Maraykanka, ayaa waxa la weydiiyey sababta uu Foden u ciyaarsiin waayey, waxaanu ku andacdooday dood kale oo ah in aanu laacibkani waligii Man City uga ciyaarin khadka dhexe, isaguna uu u baahnaa inuu ciyaartoyda khadka dhexe beddelo.
“Waxa aanu ku fikirnay in ay fiican tahay in aanu isla kooxdii [shaxdii kulankii koowaad ee Koobka Adduunka] aanu kusoo bilowno. Kaddib waxa aanu keenay Jack iyo Marcus oo aanu ka horreysiinay Phil. Waxa aanu ku fikirnay in Jack uu si fiican kubadda noogu wadayo, Marcus na uu leeyahay xawaare dheereeya, sidaasna aanu khatar ugu abuuri karayno.” Ayuu yidhi Gareth Southgate.
Isaga oo hadalkiisa sii wata waxa uu raaciyey: “Ma aanaan dareemayn in ay fiican tahay, in Phil uu ka ciyaaro khadka dhexe, sababtoo ah kooxdiisa halkaas ugama aanu ciyaarin.”
Viva brazil