Xulka qaranka France ayaa si xoog badan ku bilowday difaacashada Koobka Adduunka, waxaanay 4-1 ku karbaasheen Australia oo isku carisay markii ay gool waqti hore ahaa kala hormartay.
Olivier Giroud ayaa laba gool saxeexay, laba kalena waxa qaybsaday Ousmane Demebele iyo Kylian Mbappe, halka goolka madiga ahna uu waqti hore Australia u keenay Goodwin.
Ciyaartan oo inta badan Faransiisku maamulayay, isla markaana fursado aad u badan ay heleen labadii qayboodba, ayaa uu Didier Deschamps ku raaxaysanayay daawashada xiddigihiisa, inkasta oo uu ka nixiyey dhaawac bilowgiiba garoonka lagaga saaray Lucas Hernandez oo isaga oo garbaha la hayo laga saaray garoonka.
Daqiiqaddii 9aad ayay Australia gool kaga nixiyey xulka France, kaddib markii uu Leckie kubbad kusoo garaacay Lucas Hernandez oo uu ugu gooyey dhinaca bidix, waxaanu usoo dhiibay Goodwin oo isaguna shabaqa ku hubsaday. Kubbaddan ayaa waxa ku dhaawacmay Lucas Hernandez oo lagu soo beddelay walaalkii Theo Hernandez.
Goolkan ayaa waxa uu firfircooni ku abuuray khadka dhexe ee Faransiiska, iyaga oo si buuxda gacanta ugu dhigay maamulka kubadda isla markaana cadaadis badan soo saaray goolka Australia oo iyaguna isku dayay inay difaacdaan goolka ay la hormareen.
Adrien Rabiot ayaa goolka barbarraha u keenay Faransiiska daqiiqaddii 27aad, isaga oo madax awood badan ku dhamaystiray kubbad uu usoo dhiibay Theo Hernandez oo dhinaca bidix uu kasoo jabiyey. Goolhaye Ryan ayaan wax fursad ah u helin inuu kubaddaas badbaadiyo.
Shan daqiiqadood kaddib ayuu xulka Faransiisku sii dheeraystay hoggaanka ciyaarta, waxaana kubbad uu Rabiot ka boobay difaaca uu u gujiyey Mbappe oo isaguna cidhib ugu dhiibay, waxaanay uu Rabiot usii dhiibay Olivier Giroud oo goolka oo cidlo ah hortaagan oo uu aadyar lugta ku dhamaystiray, waxaanay ciyaartu noqotay 2-1.
Markii lagu soo noqday qaybta labaad ayuu xulka Faransiisku sii watay culayska badan, iyaga oo kubaddana ka ilaaliyey Australia oo ay kubbad-haynta gaadhsiiyeen 70.6%.
Kylian Mbappe ayaa goolkiisa helay daqiiqaddii 68aad ee ciyaarta, waxaana kubbad uu Ousmane Dembele uu usoo dhiibay uu ku leexiyey goolka, sidaasna waxay kusii dheeraysteen hoggaanka.
Hadiyad uu Mbappe u madax u saaray ayuu Olivier Giroud ku hubsaday shabaqa, iyadoo ciyaartana uu ka dhigay 4-1, halka uu sidoo kalena goolkaasi ku barbarreeyey rikoodhkii gool-dhalinta Thierry Henry oo ay hadda leeyihiin min 51 gool oo ay yihiin xiddigaha ugu goolasha badan taariikhda Faransiiska.
Olivier Giroud ayaa waxa uu fursad u haystaa in uu sii wato rikoodhkiisa gool-dhalinta inta uu socdo tartanka Koobka Adduunka ee sannadkan.
Tobankii daqiiqadood ee ugu dambeeyey ciyaarta ayay Faransiisku heleen fursado badan oo ay goolal u beddeli karayeen, waxaana kubbad loo kacay laga badbaadiyey Ibrahima Konate.
Dhinaca kale, waxa xulkiisa dhulka la galay Robert Lewandowski oo rikoodhe ka khasaariyey kulan ay barbarro goolal la’aan ah ku dhamaysteen Mexico, kaas oo haddii uu dhalin lahaa uu dalkiisu la sinmi lahaa Sucuudiga oo ay isku group yihiin, maantana ka adkaaday Argentina.
Mexico ayaa heshay fursadaha badan ee ciyaarta, sidoo kalena inta badan haysatay maamulka balse waxay iska khasaariyeen fursado badan oo uu goolhaye Wojciech Szczesny ka dafiray.
Poland ayaa rikoodhe loo dhigay daqiiqaddii 58aad, waxaana kubadda soo qaatay Robert Lewandowski, hase yeeshee goolhayaha khabiirka ah ee Guillermo Ochoa ayaa ka raacay oo ka badbaadiyey, sidaas ayaana Lewandowski uu ku noqday ciyaartoyga khasaariyey rikoodhihii ugu horreeyey Koobka Adduunka ee sannadkan.
