Xidhiidhka kubadda cagta Faransiiska ayaa laba-daran kala doortay, kaddib markii ay noqotay inay mid raacaan Didier Deschamps iyo Karim Benzema oo ay caddaatay in aanay kusii wada jiri karin xulka qaranka Faransiiska, taas oo soo dedejisay in uu weeraryahanka Real Madrid ku dhawaaqo inuu ka fadhiistay xulka qaranka.
Didier Deschamps oo ay da’diisu tahay 54 jir ayaa xulka France u qaaday Koobkii Adduunka 2018 iyo UEFA Nations League, sidoo kalena waxa uu keenay finalka Koobkii Adduunka ee Axaddii ay Argentina rikoodheyaasha kaga qaadday.
Sida uu qoray wargeyska L’Equipe, Deschamps oo la filayay inuu ka tago xulka marka uu dhamaado Koobka Adduunka ayaa sii joogi doona xulka oo uu u hoggaamin doono tartanka Euro 2024 lagu qaban doono waddanka Germany, sidoo kalena waxa suurtogal ah inuu sii ahaan doono tababare illaa Koobka Adduunka 2026.
Madaxweynaha xidhiidhka kubadda cagta Faransiiska ee Noel Le Graet ayaa hore u sheegay inuu la kulmi doono Deschamps sannadka cusub, isla markaana ay isla meel-dhigi doonaan mustaqbalkiisa, isaga oo dhinaca kalena muujiyey inuu doonayo in Deschamps sii joogo xulka.
Arrintani waxay meesha ka saaraysaa in Karim Benzema uu kasii mid ahaado xulka France oo maalin ka hor Koobkii Adduunka ee dhowaanta dhamaaday uu Deschamps ka saaray xulkiisa, iyadoo la tuhunsan yahay in uu nacayb shaqsi ah u qabo Benzema oo horena uga maqnaa xulka muddo shan sannadood iyo badh ah ka hor intii aan lagu soo celin sannadkii hore ee 2021.
L’Equipe waxa uu sheegay in Le Graet ay u noqotay inuu kala doorto Deschamps iyo Benzema mar haddii aanay wada joogi karayn xulka, sidaas darteedna uu la saftay tababaraha oo ay u tirinayaan inuu guulo waaweyn gaadhsiiyey dalkaas maadaama uu finalka keenay laba koob adduun oo isku xiga oo uu midkood qaaday, uguna daray UEFA Nations League.
