Faransiiska ayaa dalbaday in lagu celiyo ciyaartii finalka Koobka Adduunka ee Argentina ay rikoodheyaasha kaga qaadday koobka, taas oo ay ka tirsanayaan in caddaalad-darrooyin ay ku dhaceen oo aya tahay in lagu celiyo.
In ka badan 200,000 qof ayaa saxeexay codsi ‘petition’ ay FIFA kaga dalbanayaan in lagu celiyo finalkii Koobka Adduunka ee Axaddii oo rikoodheyaal 4-2 ah lagaga badiyey, kaddib markii ay ciyaarta oo lagu daray waqti dheeraad ah ay kusoo dhamaatay 3-3.
Lionel Messi iyo Angel di Maria ayaa hoggaanka u dhiibay Argentina qaybtii hore, balse Kylian Mbappe ayaa ugu jawaabay laba gool oo ay laba daqiiqadood oo kali ahi u dhexeeyeen. 30 daqiiqadood oo dheeraad ahaa oo lagu daray ayuu mar kale Lionel Messi hoggaanka u dhiibay xulkiisa oo uu ciyaarta k dhigay 3-2, balse Mbappe ayaa mar gool saddexaad dhaliyey oo barbarro ka dhigay ciyaarta.
Faransiiska ayaa u gudbiyey FIFA codsi ay ku doonayaan in loogu sameeyo wax aan macquul ahayn oo ay ogyihiin in aanay dhacayn, waxaanay codsadeen in lagu celiyo finalkii iyaga oo ku dooday in rikoodhihii bilowga ciyaarta loo dhigay Argentina ee uu Lionel Messi goolka u beddelay uu ahaa caddaalad-darro, halka dhinaca kalena ay ku doodeen in Kylian Mbappe qalad lagu galay ka hor intii aanu Di Maria dhalin goolka labaad.
Labada gool ee hore ee hore ee Argentina dhalisay ayay Faransiisku ku doodayaan in aanay waxba ka jirin oo ay qaldanaayeen, waxaana codsigooda aan macquulka ahayn ay FIFA ugu soo jeediyeen in gebi ahaanba ciyaarta lagu celiyo.
Dhinaca kale, xidhiidhka kubadda cagta Faransiiska ayaa dacwad ka dhan ah goolhayaha Argentina ee Emiliano Martinez u gudbiyey FIFA, waxanay ka dalbadeen in lagu sameeyo anshax-marin, kaddib markii uu maalmihii ugu dambeeyey ku maadaysanayay Kylian Mbappe.
Emiliano Martinez ayaa ciyaartoyda xulkiisu ay ku laabteen Argentina lasoo baxay boombalo uu ku yaallo sawirka Kylian Mbappe oo loo ekaysiiyey canug yar, taas ayaana ka cadhaysiisay xidhiidhka kubadda cagta Faransiiska.
