Ka dib markii ay soo dhamaatay ciyaartii ay Arsenal 2-0 ku garaacday Tottenham, waxaa dhacay rabshad ay qeyb ka ahaayeen ciyaartoyda iyo taageerayaasha labada kooxood.
Xiisada garoonka ayaa sarre u kacday dhamaadkii ciyaarta markii uu taageere Tottenham ah haraantiyay goolhayaha Arsenal Aaron Ramsdale.
Goolhayaha Arsenal ayaa markii hore waxay isku dhaceen weeraryahanka Tottenham Richarlison durbadii ay ciyaarta dhamaatay.
Weeraryahanka reer Brazil ayaa si carro leh madaxa uga riixay Ramsdale. Laakiin goolhayaha ayaa ka dhaqaaqay oo doontay caagada biyaha ee u taalay garoonka dhinaciisa.
Waana waqtigaas markii taageere Tottenham ah uu haraantiyay goolhayaha Arsenal isagoo durbadiiba damcay inuu baxsado.
Ciyaartoyda labada kooxood ayaa durbadiiba ku soo cararay goobta si ay xiisada u dejiyaan madaama Ramsdale uu doonayay inuu ka daba cararo goolhayaha.
Waxaa qabqabtay Zinchenko ka hor inta uusan goobta ka kaxeynin tababare Mikel Arteta oo ciyaartoydiisa ku amray inuu ku hor dabaaldegaan taageerayaashooda.
Granit Xhaka oo isaguna dagaal diyaar u ahaa ayuu tababare Arteta ka soo kaxeeyay goobta isagoo u soo jiiday dhanka taageerayaasha Arsenal.
Falka uu ku kacag taageeraha haraantiyay goolhaye Ramsdale waxaa durbaba cambaareeyay ururka ciyaartoyda Ingariiska ee PFA oo sheegay inaan la aqbali karin in ciyaartoyda la waxyeeleeyo.
Boliiska ayaa haatan baaraya taageeraha haraantiyay Ramsdale, waxaana lala tiigsan doonaa sharciga.
