Tababaraha xulka qaranka Faransiiska ee Didier Deschamps ayaa qirtay, in dalkiisu uu nasiib kaga badiyey England, waxaana uu amaan u jeediyey xulka Ingiriiska oo uu sheegay inay soo bandhigeen ciyaar aad u sarraysa.
Aurelien Tchouameni iyo Olivier Giroud ayaa Faransiiska u diray semi-finalka oo ay kula ballansan yihiin Morocco, waxayse ku sigteen in dhamaadkii ciyaarta laga dhaliyo goolka barbarraha iyadoo England oo bilowga qaybta labaad rikoodhe heshay uu rikoodhe kale oo loo dhigay ka lumiyey Harry Kane.
Didier Deschamps oo ka hadlay guusha xulkiisu ka gaadhay England ee ay ugu gudbeen semi-finalka, ayaa waxa uu sheegay in ay ahayd ciyaar weyn, ayna la dheeleen waddan cajiib ah oo awooddiisa farsamo iyo jidheed ba aad u sarrayso.
Waxa kale oo uu caddeeyey in ay nasiib lahaayeen oo uu waqtigu saacadiday, waxaanu yidhi: “Waxay ahayd ciyaar weyn, waxa aanu la ciyaarnay England oo ah xul heersare ah oo farsamadooda iyo awooddooda jideedba xooggan tahay.
“Wax cajiib ah ayay u tahay ciyaartoyda inay mar kale yimaaddeen afarta ugu dambaysa. Nasiib yaanu lahayn inkasta oo aanu isku keenay laba rikoodhe, laakiin waxa aanu ilaashanay hoggaankayaga anaga oo kaashanayna qalbigayaga.”
Faransiiska ayaa waxay Arbacad la ciyaari doonaan Morocco, waxaana midkooda soo baxaa uu finalka ugu tegi doonaa Argentina iyo Croatia midkooda soo adkaada Salaasada.
