Dhakhtarka Lionel Messi oo lagu magacaabo Diego Schwarzstein ayaa sheegay inuu doonayo in xulka qaranka Argetnina laga badiyo oo ay guul-darraystaan dhamaan kulamada wareegga group-yada ee Koobka Adduunka, isla markaana ay sidaas kaga hadhaan.
Schwarzstein ayaa qayb weyn kasoo qaatay waayaha ciyaareed ee Lionel Messi iyo noloshiisaba, isaga oo ka daaweeyey xanuun yaraantiisii ku dhacay oo saamayn ku yeesha korriinka xubnaha jidhka oo loo yaqaano Groth Hormone Deficiency.
Afar sannadood kaddib markii uu Schwarzstein ka daaweeyey Lionel Messi xanuunkan, ayaa waxa uu u wareegay Barcelona oo uu ku biiray kulliyaddeeda da’yarta, isaga oo halkaas kusoo bbarbaray, uguna soo dallacay kooxda koowaad.
Waqtiga uu Messi xanuunkani ku dhacay waxa uu ka tirsanaa kooxda Newell’s Old Boys, waxaana nasiib wanaag helay dhakhtarkan oo daaweeyey, balse hadda doonaya in xulka Argentina laga badiyo dhamaan kulamada wareegga koowaad si ay uga hadhaan Koobka Adduunka.
Diego Schwarzstein oo waraysi siiyey wargeyska The Times, ayaa waxa uu sheegay, in aanu doonayn in Argentina ay xataa hal ciyaar badiso Koobka Adduunka, waxaanu yidhi: “Anigu waxa aan taageeraa kubadda cagta, waanan jeclaan lahaa in Argentina ay ku guuleysato Koobka Adduunka, laakiin muwaadin Argentine ahaan iyo binu-aadam ahaanba, waxa aan jeclaan lahaa in Argentina guul-darraysato saddexda ciyaarood ee group-yada, lagana reebo Koobka Adduunka oo ay group-yada ku hadhaan.”
Isaga oo sharraxaya sababta, waxa uu Diego Schwarzstein intaa ku daray: “Sababtoo ah, dawladda halkan [Argentina] ka jirta ee liidata, waxa haddii Argentina ku guuleysato koobka adduunka ay u isticmaali doontaa inay ku daboosho fashilkeeda. Waxay shaacin karaan in lacagta dalku dhulka gushay isla maalinta ay kooxdu ciyaarayso, iyadoo ay dadku kasii jeedaan.”
