Xiddig waqti fiican kusoo qaatay horyaalka waddanka Ingiriiska ee Premier League, una soo ciyaaray kooxo ay ka mid yihiin Liverpool iyo Arsenal ayaa ku dhawaaqay inuu musalafay oo aanu wax lacag ah haysanin, isla markaana lagu leeyahay deyn ka badan £1 milyan oo Gini.
39 jirkan oo mushaharooyin badan ka qaadan jiray kooxo badan oo Ingiriis ah oo uu iskaga gudbay laakiin ay ugu caansanaayeen Liverpool iyo Arsenal, ayaa waxa hortegay maxkamadda magaalada Birmingham, waxaana loo diiwaangeliyey inuu musalafaya muddo sannad ah oo aanu wax lacag ah haysanin.
Lacagta £1 milyan ee Gini ee lagu leeyahay ayaa waxa la sheegay, inuu ka qaatay meelo kala duwan, isla markaana aanu iska bixin karayn waqtigan.
Qof ka agdhow laacibkan oo ay saxaafaddu soo xigatay ayaa yidhi: “Meel kasta oo uu tago waxa lagaga leeyahay lacago kaash ah. Deynta lagu leeyahay waxay gaadhay tiro toddoba-god ah [milyan].
“Deyntiisa waxa ka badan lcagta cashuuraha iyo bangiyada oo aad u badan.”
Xiddiga dhibaatadan ku jira waa weerarkii garabka ee Jermain Pennant oo hadda kiiskiisu maxkamadda ku jiro, iyadoo ay soo dacweeyeen dadka shirkadaha deymaha badan ku leh.
Sababta deyntan badan loogu yeeshay ayaa lagu sheegay in laacibkan ay ku fadhiisteen guryo uu dhisayay, isla markaana shirkaddiisa warbaahinta ee Jermaine Pennant Ltd lagla laabtay liisankii la siiyey sannadkii 2020.
Markii uu ka fadhiistay kubadda cagta ayuu Pennat la yimid hal-abuur ganacsi, waxaana ka sokow dhismeyaasha uu samaynayay iyo shirkadda warbaahinta, uu dhinaca kale kasoo muuqanayay Celebrity Big Brother iyo telefishanno uu barnaamijyo ka qaban jiray.
Si kastaba, Pennant ayaa ciyaaraha ka fadhiistay sannadkii 2017 isaga oo waayihiisa ciyaareed kusoo xidhay kooxda Billericay Town.
