Kooxda kubadda cagta Manchester United ayaa lumisay xiddig ay xagaagii la saxeexatay oo si rasmi ah uga tegay maanta iyadoo uu soo afjaray waayihiisii Old Trafford, kaddib markii uu tababare Erik ten Hag siin waayey fursad ciyaareed oo uu isku muujiyo.
Dhawr bilood oo uu joogay Old Trafford kaddib, goolhaye Martin Dubravka ayaa dib ugu laabtay kooxdiisii Newcastle United oo go’aansatay inay soo gabogabayso heshiiskii amaahda ahaa ee ay goolhayahan ugu dirtay Red Devils.
Dubravka ayaa laba ciyaarood oo kaliya oo ahaa Carabao Cup u saftay Manchester United, waxaana uu inta badan ku jiray kursiga kaydka iyadoo uu tababare Erik ten Hag kalsooni buuxda ku qabo David de Gea oo uu tartamada oo dhan ciyaarsiinayay.
Newcastle United ayaa go’aansatay inay burburiso heshiiskii amaahda oo ay dib ugu yeedhato goolhaye Dubravka oo illaa hadda aan xataa hal kulan oo Premier League ah kasoo muuqanin Manchester United.
Waqtigiisii Old Trafford ayuu Dubravka ku xasuusan doonaa inuu laba guulood ku hoggaamiyey Manchester United kulamadii Aston Villa iyo Burnley ee Carabao Cup, iyadoo ciyaartii Burnley uu sameeyey qalad sababay in laga dhaliyo gool.
Newcaslte oo uu goolhayaha koowaad u yahay Nick Pope ayaa uu kursiga kaydka u fadhiisan doonaa, balse waxa la filayaa in fursad ka fiicani middii Manchester United laga siin doono St Jame’s Park Stadium.
“Hadda waxa uu tartan la geli doonaa Nick Pope oo sagaal ciyaarood shabaqiisa nadiif ka dhigay xilli ciyaareedkan, ahna goolhayaha ugu badan ee shabaqiisa ilaashaday.”
