Xulka qaranka Faransiiska ayuu kusii faafayaa Fayraska Geela (Camel Virus) ee ka dillaacay xarunta ay tababarka ku qaadanayaan, waxaana iyadoo maanta duhurkii xanuunkooda la xaqiijiyey Raphael Varane iyo Ibrahima Konate haddana la xaqiijiyey in aanu tababarka kasoo xaadirin xiddiga khadka dhexe ee Aurelien Tchouameni.
Lix ciyaartoy ayaan kasoo xaadirin tababarkii maanta ee xulka qaranka Faransiisku iskugu diyaarinayay finalka Koobka Adduunka ee Axadda ay Argentina ku kala calaf-qaadi doonaan.
Didier Deschamps ayaa walaacsan oo ciyaartoydiisa ku amray inay kala fogaadaan, sidoo kalena xidhaan maaskaro si aanay isku qaadsiinin fayraskan sida xawliga ah ugu faafaya.
Dayot Upamecano oo ahaa ciyaartoygii koowaad ee uu fayrasku ku dhacay ayaa dib ugu soo laabtay tababarka, hase yeeshee waxa wali maqan labadii ciyaartoy ee ku xigay ee uu fayrasku ku dhacay ee Adrien Rabiot iyo Kingsley Coman, waxaana maanta liiska ku biiray Ibrahima Konate iyo Raphael Varane oo iyaguna xanuunkani ku dhacay.
Sida uu tabiyey telefishanka RMC ee Faransiiska xaruntiisu tahay, waxa kale oo tababarkii maanta ka maqnaaday Aurelien Tchouameni oo laf-dhabar khadka dhexe ah u ah xulka Faransiiska iyo difaaca bidix ee Theo Hernandez, kuwaas oo liiska maqaneyaasha ka dhigay lix ciyaartoy.
Tchouameni ayaa la sheegay in uu soo gaadhay dhaawac fudud oo ay suurtogal tahay in uu kasoo kabto Sabtida, balse Theo Hernandez ayaa isaguna u jiifa dhaawac jilibka ah oo kasoo gaadhay ciyaartii Morocco, lamana hubo in uu taam nqoon doono iyo in kale.
