Tababarihii xulka qaranka Brazil ee Tite ayaa ku dhawaaqay, in uu iscasilay oo uu iskaga tegay shaqada saacad kaddib markii uu xulka qarankiisa Brazil ka hadhay Koobka Adduunka oo ay Croatia ku garaacday rikoodheyaal.
Brazil oo ka mid ahayd dalalka aadka loogu saadaalinayay Koobka Adduunka ayaa waxa rikoodheyaal 4-2 ah ku garaacday Croatia, waxaanay taasi keentay in Tite uu si degdeg ah u shaaciyo inuu ka tegay xulka.
Xidhiidhka kubadda cagta Brazil ayaan wali ka hadal iscasilaadda Tite uu hadda ku dhawaaqay, balse waxa la filayaa in ay war-saxaafadeed kasoo saaraan iyaga oo dhinaca kalena u ballan-qaadaya taageereyaasha xulka qaranka waqtiga la magacaabi doono beddelka Tite oo saxaafadda u sheegay in aga bilaabo ciyaartii Croatia in aanu ahayn tababaraha Brazil.
Bishii February ayuu Tite sii sheegay, in uu soo gabogabayn doono muddo lix sannadood ah oo uu ahaa tababaraha xulka Brazil marka uu soo dhamaado Koobka Adduunka, waxaana waqtigii uu ballan-qaaday ay ku ekayd dhamaadka ciyaartii Croatia.
Sannadkii 2006 ayaa uu Tite noqday tababaraha Brazil, isaga oo beddelay Dunga oo shaqada ka tegay June 2016, waxaanu u hoggaamiyey Koobkii Adduunka 2018 oo semi-finalka ay soo gaadheen balse ay Belgium reebtay.
2019 ayaa uu Tite xulka Brazil kula guuleystay Copa America, halka sannadkii 2021 oo ay finalka Copa America yimaaddeen ay Argentina koobka ka qaadday.
Afar tababare ayaa la sheegay in midkood ay suurtogal tahay in uu beddelo Tite, waxaana ugu horreeya Muricy Ramalho oo hore loogu arkayay inuu beddelayo Scolari balse uu booskaas uga hormaray Dunga.
Ramalho ayaa soo layliyey kooxda Sao Paulo oo uu ku yeeshay sumcad badan, waxaana hore u dalbaday in laga dhigo tababaraha Brazil halyeygii waddankaas ee Zico.
Wararka hordhaca ah ee soo baxaya kaddib iscasilaadda Tite, ayaa waxay sheegayaan in ay sidoo kale suurtogal tahay in Zico uu noqdo tababaraha cusub ee Brazil, waxaase iyagana ay magacyadoodu miiska saaran yihiin Marcelo Oliveira oo ah tababaraha Cruzeiro iyo Abel Braga oo difaaca uga ciyaari jiray PSG, isla markaana hal ciyaar oo kaliya u saftay xulka Brazil.
Braga waa 61 jir waqtigan layliya kooxda heerka afraad ee Brazil ee Interncional, balse xidhiidhka kubadda cagta Brazil ayaa laga sugayaa in uu shaaciyo macallinka ay u doorteen inuu beddelo tababare Tite.
