Tababaraha xulka Ingariiska Gareth Southgate ayaa si rasmi ah uga laabtay go’aankiisii hore ee aheyd inuu ka tago shaqada xulka, wuxuuna haatan go’aansaday inuu sii hogaamiyo xulka Three Lions.
Southgate ayaa ka farxiyay xiriirka kubada cagta Ingariiska isagoo u sheegay inuu sii ahaanayo tababaraha xulka Ingariiska.
Tababaraha ayaa la aaminsanaa in Koobka Adduunka uu noqon doono markii ugu danbeysay ee uu hogaamiyo England, wuxuuna sidaasi qiray ka dib markii Ingariiska lagu soo reebay wareega sideed dhamaadka.
Laakiin wuxuu haatan diyaar u yahay inuu xulka Ingariiska ku hogaamiyo koobka Euro 2024 ee ka dhacay dalka Jarmalka.
Warkaan ayaa imaanaya xilli tababaraha Newcastle Eddie Howe oo shaqada lala xiriirinayay uu sheegay inuu rajeynayay in Southgate uu sii ahaado tababaraha England madaama uu shaqo fiican qabtay.
Xiriirka kubada cagta Ingariiska ayaa neef weyni ay ka soo fuqday ka dib markii uu Southgate ka laabtay go’aankiisii hore.
Southgate ayaa sheegay ka dib markii Ingariiska laga reebay Koobka Adduunka inuu ka fiirsanayo mustaqbalkiisa isagoo ka careynaa dhacdo dhacday bishii Juun ee sannadkan.
Taageerayaasha xulka Ingariiska ayaa waqtigaas ku ooriyay tababaraha Ingariiska markii ay xulkiisa guuldarro 4-0 ka soo gaartay Hungary kulan ka tirsanaa UEFA Nations League.
Si kastaba, codsi uga yimid ciyaartoyda xulka England ayaa bedelay go’aanka Southgate oo haatan sii ahaanaya tababaraha England.
Southgate ayaa England gaarsiiyay finalka Euro 2020 halka uu sidoo kale gaarsiiyay semi-finalka Koobka Adduunka sannadkii 2018.
