Horyaalka waddanka Ingiriiska ee Premier League oo maanta la ciyaaray kulamadiisii koowaad ee muddo lix usbuuc ah oo lagu maqnaa fasaxa Koobka Adduunka ayaa waxa durba la qoray warqadda shaqada lagaga caydhinayo tababare weyn oo go’aan laga gaadhay.
Premier League ayaa xilli ciyaareedkan ahaa midka ugu badan ee shaqada laga eryo tababareyaasha, waxaana macallimiintoodii eryey kooxo ay ka mid yihiin Chelsea, Wolves, Aston Villa, Bournemouth iyo Southampton hase yeeshee intaas kuma ekaanayso waxaana caawa la qoray warqadda shaqada lagaga eryayo tababare kale.
Chelsea iyo Leicester City ayay tababareyaashooda Graham Potter iyo Brendon Rodgers ay culayso badan saaran yihiin, waxaana la is-weydiinayaa muddada ay sii joogi doonaan haddii aanay isbeddel degdeg ah ku samaynin natiijooyinka ay kooxahoodu ka keenayaan horyaalka Premier League.
Laakiin labadoodaba waxa ka horreynaya macallin kale oo kaliya sugaya inta la qabanayo shirka jaraa’id ee shaqada lagaga eryayo, iyadoo ay kooxdiisu bilowday raadinta macallinkii u beddeli lahaa, waana kooxda Everton oo ugu dambayntii uu ka dhamaaday samirkii ay u haysay Frank Lampard.
Toffees oo caawa ay Wolves ku garaacday 2-1 ayaa u dhacday kaalinta 17aad, waxayse min hal dhibic oo kaliya ka dambeeya Wolves iyo Nottingham Forest halka Southampton oo soo guuleysataana ay hal dhibic ka sarrayn doonto, taas oo hoos ugu sii ridi karta khadka cas.
Wargeyska The Sun ayaa shaaciyey in Frank Lampard shaqada laga caydhinayo oo go’aankiisa la gaadhay, waxaana arrintaas xaqiijiyey difaacii hore ee Everton ee Stephen Warnock oo isaguna sheegay in la eryayo Frank Lampard oo haddii cimrigiisu dheeraado kaliya sii joogi doona Goodison Park illaa Sabtida oo ay Manchester City ugu tegi doonaan Etihad Stadium.
