Waxa sii badanaya tirada tababareyaasha iska casilaya xulalkooda kaddib markii ay ka hadheen Koobka Adduunka, waxaana iyadoo la hadal hayo shaqo ka tegistii tababare Roberto Martinez hadda go’aankiisa caddeeyey Otto Addo oo markii uu dalkiisu ka hadhay Koobka Adduunka ku dhawaaqay inuu is-casilay.
Tababaraha xulka qaranka Ghana ee Otto Addo ayaa shaaciyey inuu ka tegayo shaqada xulka qarankaa dalkiisa Ghana, kaddib markii ay ku hadheen wareegga koowaad ee group-yada ee Koobka Adduunka.
Otto Addo oo xulkiisu uu guul-darro 2-0 ah kala kulmay Uruguay ayaa kaalinta afraad kaga dhamaystay Group H, iyadoo ay isla hadheen Uruguay oo guuleysatay balse ay Portugal iyo South Korea kasoo wada baxeen hormadooda.
Saxaafadda ayuu la hadlay Otto Addo waxaanu sheegay inuu ka tegayo xulka qaranka oo uu hadda dedaalkiisa iskugu geynayo shaqadiisa kale ee kooxda Borussia Dortmund, waxaanu yidhi: “Hore ayaan u sheegay bishii October in marka uu dhamaado Koobka Adduunka in aan ka tegayo xulka.
“Waqtigan aniga iyo qoyskayguba waxa aanu u jeedsanaynaa mustaqbalkayaga Germany, waxaanan jeclaan lahaa in aan qaato doorkayga Dortmund, aadna waanu ugu faraxsanahay.
“Maalintii aan bilaabay shaqada xulka qaranka ayaan sheegay, in haddii aanu soo baxno, in Koobka Adduunka kaddib aan tegi doono, xataa haddii aanu koobka ku guuleysano.”
