War rasmi ah oo ay goordhaweyd soo saartay kooxda reer Ukraine ee Shakhtar Donetsk ayay ku sheegtay inaysan weli hishiis rasmi ah kala gaarin Chelsea saxiixa Mykhaylo Mudryk.
Khabiirka suuqa kala iibsiga Fabrizio Romano ayaa mar sii horeysay shaaciyay in Blues ay kala hishiisay Shakhtar Donetsk saxiixa 22 jirkaan garabka weerar ka ciyaara.
Shakhtar ayaase beenisay haatan warkaan laakiin waxay qirteen in qarka loo saaran yahay inay Chelsea kala hishiiyaan saxiixa Mykhaylo Mudryk ka dib kulankii maanta dhexmaray labada kooxood.
Warbixin ay Shakhtar Donetsk ku soo qortay Twitter ayaa lagu yiri: “Madaxweyanah FC Shakhtar Rinat Akhmetov iyo milkiilaha labaad ee Chelsea Behdad Eghbali waxay ka wada hadleen saxiixa Mykhailo Mudryk ee Chelsea FC maanta.
“Labada dhinac waxay qarka u saaran yihiin inay ka hishiiyaan saxiixa ciyaaryahanka.”
Sida Fabrizio Romano uu sheegay Chelsea ayaa miiska u saartay Shakhtar Donetsk lacag gaareysa 100 milyan euro oo aheyd lacagtii ay dalbaneysay kooxda reer Ukraine.
Wuxuu khabiirka suuqa kala iibsiga sheegay in Chelsea ay u bandhigtay ciyaaryahanka qandaraas todoba sannadood ah oo dhacaya ilaa iyo xagaaga 2030ka.
Balse wuxuu qiray in ciyaaryahanka uu mar walba doonayay kooxda Arsenal oo weli aan laga soo jawaabin dalabkeedii 84ta milyan ginni ee ay ka gudbiyeen ciyaaryahanka.
Mykhaylo Mudyrk ayaa la sheegay inuu haatan ku sii jeedo London, waxayna u badan tahay inuu ka degayo Stamford Bridge.
