Raheem Sterling ayaa ka tagay dalka Qatar islamarkaana u duulay Ingariiska isagoo isaga baxay xulka dalkiisa ka dib markii tuugo ay jabsadeen gurigiisa sida ay shaacisay The Sun.
Xiddiga Chelsea ayaa isaga tagay xulka England ka hor kulankoodii wareega 16ka ee ay ka badiyeen xulka Senegal ka dib markii uu ogaaday in habeenkii Sabtida la jabsaday gurigiisa ku Surrey.
Weli lama oga hantida laga xaday guriga Sterling waana sababta uu dib ugu soo cararay England si uu ogaado waxyaabihii laga qaatay gurigiisa.
Afhayeen u hadlay xulka Ingariiska ayaa sheegay in ciyaaryahanka Chelsea uusan ka qeyb qaadan doonin kulanka wareega 16ka madaama uu xalinayo arimo qoys oo soo wajahay.
Warbixin ay England soo saartay ayaa lagu yiri: “Raheem Sterling uma ciyaarayo Three Lions caawa madaama uu la tacaalayo arimo qoys.”
Tababaraha England Gareth Southgate ayaa sidoo kale ka hadlay sababta uu Sterling uga tagay xulka Ingariiska isagoo yiri: “Wuxuu ku mashquulsan yahay arimo qoyseed.
“Waqti ayaan saaka la qaatay isaga laakiin arintiisa waxaa u gudbiyay dad kale oo caawin kara.”
Markii la weydiiyay haddii uu ku soo laabanayo xulka, wuxuu yiri: “Marka hore wuxuu xalinayaa xaalada heysata, Ka dib ayaan eegi doonaa waxa dhaca.”
Sterling ayaa la filayaa inuu dib ugu laabto Qatar iyadoo England ay u gudubtay wareega sideed dhamaadka islamarkaana ay la ciyaareyso France Sabtida soo socota.
