Xulka qaranka Brazil ayaa shaaciyey in laba ciyaartoy oo xalay ka dhaawacmay ay macasalaameeyeen Koobka Adduunka oo ay ka maqnaan doonaan inta ka hadhay tartanka. Labada ciyaartoy ee dhaawacmay oo uu usii raaco Neymar oo xaaladdiisu wali cirka ku shareeran tahay, ayaa tababare Tite ku ridaya madax-xanuun.
Weeraryahanka kooxda kubadda cagta Arsenal ee Gabriel Jesus oo uu dhaawac kasoo gaadhay jilibka ciyaartii Cameroon ee xalay ayaa la xaqiijiyey in uu muddo toddobaadyo ah maqnaan doono, isla markaana sidaas kaga baxay liiska xulka qarankiisa Brazil.
Waxa kale oo isaguna dhaawacmay oo isaga oo ooyaya laga saaray garoonka difaaca bidix ee kooxda Manchester United ee Alex Telles oo isaguna muddo dheer garoomada ka maqnaan doona.
Telles oo garoonka ka baxay qaybta labaad oo toban daqiiqadood socota markii uu dhulka si xun ugu dhacay iyo Gabriel Jesus oo jilibka wax ka noqday ayaa labadaba ay uga dhamaatay Koobka Adduunka.
Wargeyska Globo ee kasoo baxa waddanka Brazil ayaa helay xogta dhaawaca Jesus iyo Telles, kaddib markii saaka lagu sameeyey baadhitaano iyada oo laga qaaday sawirro, kuwaas oo natiijadeedu noqotay in aanay mar dambe ciyaari doonin Koobka Adduunka ee uu dalkoodu usoo baxay wareegga 16ka.
Gabriel Jesus ayaa muddo bil ah groomada ka maqnaan doona sida uu sheegay wargeyska Globo, waxaanay taasi dhibaato ku tahay Arsenal oo aanu u ciyaari doonin kulanka West Ham ee dhamaadka bishan December.
Alex Telles ayuu dhaawaciisu halis yahay marka loo eego midka Gabriel Jesus, waxaanu u baahan doonaa qalliin degdeg ah oo lagaga sameeyo jilibka kaas oo sababi kara in xilli ciyaareedkan socda oo dhan uu garoomada ka maqnaado.
Brazil oo wareegga 16ka Koobka Adduunka la ciyaari doona Koonfur Korea ayaa waxa hore walaac ugu hayay Neymar oo ku dhaawacmay ciyaartii Serbia ee bilowga Koobka Adduunka, waxaana uu ka maqnaa kulamadii Switzerland iyo Cameroon, haddana shaki weyn ayaa la gelinayaa taam ahaanshihiisa ciyaarta Koonfur Korea.
