Xiddiga kooxda Real Madrid ee Karim Benzema ayaa sii wada inuu ka fogaado ciyaartoyda iyo tababareyaasha xulka qaranka Faransiiska, kaddib markii loo diiday inuu ciyaaro Koobkii Adduunka ee Qatar lagu qabtay oo isaga oo dhaawac fudud qaba uu Didier Deschamps ka saaray ciyaartoydiisa.
Karim Benzema ayaa hore u shaaciyey inuu ka fadhiistay ciyaaraha caalamiga ah oo aanu mar dambe u safan doonin xulka Faransiiska, waxaanu go’aankiisaas shaaciyey Isniintii toddobaadkan, maalin kaddib markii ay Argentina rikoodheyaal ku garaacday Faransiiska.
Waxa kasii horreysay in uu Karim Benzema xidhiidhka u jaray tababare Didier Deschamps, ku xigeennadiisa iyo dhakhtarka kooxda intaba, taas oo uu sameeyey maalmo kaddib mrkii uu tababaruhu ku wargeliyey inuu iskaga dhex baxo ciyaartoyda xulka.
Benzema oo sii wada inuu ka aargoosto, sidoo kalena ka fogaado ciyaartoyda xulka qaranka Faransiiska ayaa qaaday tallaabo kale oo maanta uu ku dhaqaaqay, taas oo si dhab ah usoo afjari doonta xidhiidhadii ay ciyaartoyda lahaayeen, xataa kuwii ay saaxiibbada hore u ahaan jireen, marka laga reebo shan ciyaartoy oo kaliya.
Xiddiga sannadka ee haysta abaal-marinta Ballon d’Or ayaa jaray xidhiidhkii baraha bulshada, waxaana uu dhamaan saaxiibtinimadii Instagram kala laabtay ciyaartoyda xulka, marka laga reebo shan ciyaartoy oo kaliya oo laba ka mid ah ay u wada ciyaaraan Real Madrid, midna hore ay Santiago Bernabeu waqti ugu soo wada qaateen iyo laba kale.
20 ka mid ah 25ka ciyaartoy ee xulka qaranka Faransiiska ee tegay Koobkii Adduunka ayaa uu Benzema u jaray xidhiidhkii baraha bulshada, balse waxa uu kala hadhay saaxiibbadiisa Real Madrid ee Eduardo Camavinga iyo Aurelien Tchouameni. Sidoo kale, Raphael Varane oo ay waqti badan usoo wada ciyaareen Real Madrid ayaa isaguna ka mid ah shanta ciyaartoy ee aanu xidhiidhkooda jarin.
Kylian Mbappe oo ay saaxiibtinimo qoto-dheer ka dhaxayso iyo da’yarka uu dhalay halyeygii difaaca reer France ee Lillian Thuram ee Marcus Thuram ayaa ah iyagana uu saaxiibtinimadooda ilaaliyey Karim Benzema, waana shantaas ciyaartoy oo kaliya kuwa uu xidhiidhkoodii Instagram sii jiro.
Waxa kale oo uu Karim Benzema xidhiidhka kala laabtay dabaakha caanka ah ee reer Dubai ee Nusret Gokce oo loo yaqaano Salt Bae.
