Hooyada dhashay halyeyga Chelsea ee Gianluca Vialli ayaa si degdeg ah uga soo duushay waddanka Talyaaniga, waxaanay soo gaadhay magaalada London kaddib markii ay kasii dartay xaaladda xiddigan hore ee Blues oo uu ku dhacay xanuunka halista ah ee kansarka.
Vialli oo weerarka uga ciyaari jiray xulka qaranka Talyaaniga iyo kooxda Chelsea ayaa usbuucyadii ugu dambeeyey yaallay cusbitaal lagula tacaalayay xaaladdiisa markii uu kusoo laba kacleeyey, jidhkiisana ku faafay kansar uu sannado ka hor ka ladnaaday.
58 jirkan ayaa sannadkii 2017 laga daaweeyey xanuunkan, waxaanay dhakhaatiirtu u sheegeen 2020 in uu taam ka noqday, taas oo keentay in uu tababare ku xigeen ka noqdo xulkii Talyaaniga ee ku guuleystay tartankii qaramada Yurub ee Euro 2020, balse mar kale ayuu xanuunku kusoo laabtay, waxaana uu iska casilay shaqadii xulka Talyaaniga isaga oo galay cusbitaal xaaladdiisa lagula tacaalayay.
Sida uu sheegay wargeyska Corriere Della Sera ee kasoo baxa waddanka Talyaaniga, xaaladda Vialli ayaa kasii daraysay maalmihii ugu dambeeyey, waxaanay taasi keentay in ay safar degdeg ah oo aan hore loosii qorshaynin ay Talyaaniga kaga soo baxaan Maria Teresa oo ah hooyaada dhashay Vialli oo ay da’deedu tahay 87 jir iyo walaalkii oo hadda kula sugan cusbitaalka.
Hooyada dhashay Vialli ee Maria iyo walaalkii ayaa Isniintii shalay ka duulay magaalada London oo ku laabtay gurigooda oo ku yaalla Cremona oo u dhow magaalada Milan, hase yeeshee maanta ayay si degdeg ah ugu soo noqdeen Ingiriiska markii ay kasii dartay xaaladda Vialli.
Gianluca Vialli oo u ciyaari jiray Chelsea, Cremonese, Sampdoria iyo Juventus ayaa xulka Talyaaniga u saftay 59 ciyaarood.
Halyeygii Chelsea ee John Terry iyo xiddigihii xulka Talyaaniga ayaa farriimo ay ugu ducaynayaan Vialli kusoo qoray baraha bulshada markii uu soo baxay warka sheegaya in xaaladdiisu halis ku jirto.
