Frank Heppner ayaa la sheegay in uu ka mid noqday 25 qof oo Arbacadii uu booliska waddanka Jarmalku xidhay, kaddib markii lagu eedeeyey in ay maleegayeen shirqool ay doonayeen inay ku afgembiyaan dawladda Jarmalka, isla markaana uu qorshahoodu ahaa inay meesha ka saaraan baarlamaanka iyo sidoo kale ra’iisal wasaaraha waddanka.
Frank Heppner oo 62 jir ah, waxa xadhiggiisu uu saamayn ku yeeshay difaaca kooxda Real Madrid ee David Alaba, kaas oo hadda la murugaysan xadhiggan oo saamayn ku yeelanaya.
Sida uu qoray wargeyska Bild ee kasoo baxa waddanka Jarmalka, baadhitaano ay sameeyeen boolisku ayay ku ogaadeen in Frank Heppner oo ka mid ah dadka caanka ah, horena u ahaa xubin sare oo milateriga qaybta loo yaqaano Reichsburger uu qayb ka yahay isku-dayga afgembiga ee lala maaganaa dawladda Jarmalka.
25ka qof ee la xidhay oo la sheegay in ay doonayeen in marka ay dawladda ridaan, in ay dalka dib ugu celiyaan boqortooyo iyo nidaamyadii hore ee kalitaliska, isla markaana kasoo horjeeda dimuquraadiyadda casriga ah, ayaa waxa xadhiga Frank Heppner uu lugaha lasoo galay David Alaba, sababtoo ah waxa uu soddog u yahay difaaca Real Madrid iyo xulka Australia
David Alba ayaa waxa uu guursaday oo wiil u dhashay Shalimar Heppner oo uu dhalay Frank Heppner, waxaana uu wargeyska Daily Mail xaqiijiyey in David Alaba uu la xidhiidhay wakiilladiisa si uu arrintan faahfaahin dheeraad ah uga siiyo.
Si kastaba ha ahaatee, lama sheegin saamaynta ay arrintani ku yeelan karayso David Alaba oo sannad iyo badh ka hor ka guuray waddanka Jarmalka oo uu muddo dheer oo uu u ciyaarayay Bayern Munich ku noolaa, waxaana uu daafacani hadda deggan yahay magaalada Madrid oo uu u guuray markii uu u wareegay Real Madrid.
