Xiriirka kubada cagta Adduunka ee FIFA ayaa ka mamnuucay xulka England in maradooda kabtanka ay ka dhigtaan calaamada qoomu luudka iyagoo uga dan leh inay ku xumeen dalka Muslimka ah ee Qatar ee martigelinaya Koobka Adduunka.
Kulan dhexmaray FIFA iyo xiriirka kubada cagta Ingariiska ayaa lagu wargeliyay xulka England inaysan Koobka Adduunka ku xiran karin caalamada qoomu luudka.
England ayaa berri waxay la ciyaareysaa xulka Iran kulankooda ay ku bilaabanayaan Koobka Adduunka.
Wuxuu go’aankaan ka horimaanayaa wadamo badan oo reer Yurub ah oo horay u sheegay inay xiranayaan caalamada qoomu luudka iyagoo doonaya inay ku xuumeeyaan wadanka Muslimka ah ee Qatar ee koobka martigelinaya.
Qatar lagama ogola wax la xiriira dhaqanka qoomu luudnimada, waxayna horay u diideen in calanka qoomu luudyada ee ka sameysan midabka qaanso roobaadka inaan lagu soo bandhigi karin garoomada Koobka Adduunka.
Ingariiska oo weli ka careysan in Qatar ay kaga guuleysatay martigelinta Koobka Adduunka ee 2022 ayaa sameynaya wax walba oo ay ku dhibi karaan wadanka martigelinaya Koobka Adduunka.
Laakiin waxaa haatan soo farogelisay FIFA oo ka diiday Harry Kane inuu calaamada kabtanimada ka dhigto kuwa qoomu luudka madaama FIFA ay ixtiraameyso diinta iyo dhaqanka Qatar.
Inkastoo FIFA ay mamnuucday hadana weli kabtanada doonaya inay xirtaan sida Harry Kane, Manuel Neuer iyo Virgil van Dijk ayaa ku adkeysanaya inay xiran doonaan.
Kabtanka xulka France Hugo Lloris ayaa sheegay inuusan xiran doonin wax lidi ku ah diinta iyo dhaqanka Qatar islamarkaana uu ixtiraamayo wadanka uu martida u yahay.
