Tababaraha xulka qaranka France ayaa go’aan adag oo lama filaan ah ka qaatay beddelka xiddiga ka dhaawacmay ee Karim Benzema oo xalay si rasmi ah loo xaqiijiyey inuu seegayo Koobka Adduunka, kaddib uu dhaawac kasoo gaadhay muruqa isaga oo tababarka la samaynaya ciyaartoyda xulkiisa.
34 jirkan ayaa uu dhaawacu soo gaadhay isaga oo kasoo kabtay dhaawac hore oo jilibka iyo muruqa ah, waxaana la sheegay inuu muddo saddex toddobaad ah garoomada ka maqnaan doono.
Dhaawaca Benzema ayaa hoos u dhigaya awoodda xulka qaranka difaacanaya Koobka Adduunka ee France, iyadoo horena ay u waayeen xiddigo waaweyn sida Christopher Nkunku, N’Golo Kante iyo Paul Pogba.
Didier Deschamps ayaa maanta gellinkii hore la sheegay inuu saddex ciyaartoy u kala dooranayo beddelka Karim Benzema, waxaana ciyaartoyda la hadal hayay ku jiray weeraryahanka Manchester United ee Anthony Martial, hase yeeshee Didier Deschamps ayaa qaatay go’aan culus oo ah in aanu beddelin Karim Benzema oo uu booskiisu iska bannaanaado.
Saxaafadda Faransiiska ayaa kasoo xigatay Didier Deschamps in uu ku adkaysanayo 25ka ciyaartoy ee hadda taamka u ah oo aanu ciyaartoy cusub kusoo kordhin doonin, taas oo ka dhigan in booska Benzema banneeyey uu iska bannaanaan doono.
“Ma beddelayo, aniga ayaana go’aamiyey in aanan ciyaartoy cusub u yeedhin.” Ayuu yidhi Didier Deschamps oo kusii daray: “Waxa aanu haysanaa siddeed weeraryahan, sida Mbappe, Griezmann, Coman, Ousmane Dembele, Giroud, M Thuram, Kolo Muani.”
Go’aanka tababare Didier Deschamps ayaa waxa uu niyad-jab ku yahay ciyaartoyda hungurigu ka hayay in midkood loo yeedhi doono, sida Martin Terrier, Moussa Dembélé, Wissam Ben Yedder, Anthony Martial iyo Alexandre Lacazette.
