Xogo cusub ayaaa kasoo korodhay sababta uu Karim Benzema uga maqan yahay xulka qaranka Faransiiska ee Koobka Adduunka, waxaana laga been sheegay dhaawaciisa markii ay isku dhaceen tababare Didier Deschamps oo ay isku maandhaafeen garoonka tababarka.
Benzema ayaa la sheegay in uu dhaawac soo gaadhay November 19 oo ahayd maalin ka hor intii aanu bilaabmin Koobka Adduunka, waxaana uu sidaas kaga tegay xulka qaranka. Laacibkan ayaa dib ugu soo laabtay garoomada oo shalay ciyaaray kulan saaxiibtinimo oo u dhexeeyey Real Madrid iyo Leganese.
Sida ay muujinayso xog uu helay oo uu maanta daabacay wargeyska Libertad Digital, Karim Benzema ayaa tababare Didier Deschamps ugu sheegay garoonka tababarka in aanu ku faraxsanayn sida uu ula dhaqmayo, kaddib markii uu laacibkan soo gaadhay tababar fudud.
Xogta ayaa sheegtay in Benzema uu kaliya u baahnaa in saddex maalmood daaweyn loo sameeyo, isla markaana uu ciyaari kari lahaa kulankii labaad ee wareegga group-yada, laakiin uu Deschamps oo ka cadhooday hadalka Benzema ee ah in aanu ku faraxsanayn sida uu ula dhaqmayo ay sababtay in Deschamps uu ku amro inuu ka dhax baxo ciyaartoydiisa, sidaana uu kaga caydhiyey xulka Faransiiska.
Deschamps ayaa iska diiday inuu ka jawaabo su’aal la weydiiyey oo ahayd inuu Benzema u yeedhayo ciyaarta finalka Koobka Adduunka ee Axadda ay Argentina iskaga hor imanayaan, waxaanay hadda xogtan cusub ee la helay sheegaysaa in Benzema ay uga dhamaatay xulka Faransiiska oo aanu ciyaari doonin inta uu Didier Deschamps tababaraha ka yahay.
Karim Benzema ayaa isaguna aan dhinaciisa doonayn inuu dib ugu laabto waddanka Qatar, mana doonayo inuu mar dambe la kulmo tababare Didier Deschamps, inkasta oo uu ku jiro liiska xulka dalkaas ee wali qaybta ka ah Koobka Adduunka.
