Weeraryahanka reer Ukraine ee Mykhaylo Mudryk ayaa hadda ku sugan xarunta maamulka Chelsea ee Cobham oo uu tijaabada caafimaadka ku maray maanta qallinkii hore, waxaana uu hadda qalinka ku duugay heshiis uu kaga mid noqonayo Chelsea.
Xiddigan oo ay Chelsea ka afduubatay Arsenal oo muddo qarka u saarnayd, ayaa waxa uu xalay ka degay magaalada London iyadoo saakana uu tijaabada caafimaadka maray oo uu ka gudbay ka hor intii aanu heshiiska saxeexay.
Mykhaylo Mudryk oo ay Chelsea €100 milyan oo Euro kaga soo iibsatay kooxda reer Ukraine ee Shakhtar Donetsk ayaa saxeexay heshiis toddoba sannadood iyo dheeraad ah oo soconaya illaa laga gaadhayo June 2030, taas oo ka dhigan in uu toddoba sannadood iyo lix bilood ahaan doono xiddiga ka tirsan Chelsea haddii aan la iibin ama aanu si kale uga tegin.
Chelsea ayaa dedejinaysa dhamaystirka heshiiska Mykhaylo Mudryk si garoonka Stamford Bridge loogu soo bandhigo ka hor inta aanay bilaabmin ciyaarta Chelsea ay ku martigelinayso Crystal Palace, isla markaana u ciyaari karo kulanka xiga ee ay Liverpool ballansan yihiin.
Heshiiska Mykhaylo Mudryk ayaa ka mid noqonaya heshiisyadii ugu waqtiga dheeraa ee lagu arko kubadda cagta, waxaanay inta badan noqon jireen shan sannadood balse Blues ayaa sidan oo kale heshiisyo dhaadheer uga saxeexday Fofana iyo Santos.
