Fadeexad ayaa ka ttaagan waddanka Cameroon, waxaana xidhiidhka kubadda cagta dalkaasi uu xulkooda ka caydhiyey 21 ciyaartoy oo eedaymo loo jeedinayo, kaddib markii uu tuhun ka dhashay da’da ay jiraan inkasta oo ay guulo soo hooyeen.
Cameroon oo kulankoodii ugu dabeeyey Koobkii Adduunka ee Qatar 1-0 ku garaacday Brazil, ayaa waxa hadal-hayn badan keenay go’aankii uu tababare Song xulka kaga eryey goolhaye Andre Onana oo ay isku dhaceen, iyadoo waliba uu ahaa goolhayaha ugu wanaagsan ee ay haysteen.
Samuel Eto’o oo ah madaxweynaha xidhiidhka kubadda cagta Cameroon ayaa qaaday tallaabooyin uu ku yaraynayo fadeexadaha iyo dhibaatooyinka dalkiisa ee dhinaca kubadda cagta ee la sheegay in sannadihii ugu dambeeyey ay soo badanayeen.
Arrinta hadda taagan ee ay dunidu hadal-hayso ayaa waxay tahay, in 21 ciyaartoy laga caydhiyey xulka qaranka dalkaas kaddib markii la ogaaday inay been ka sheegeen da’dooda, isla markaana uu socdo baadhitaan lagu samaynayo ciyaartooyo badan oo kale.
Xulka Cameroon ee ay da’doodu ka hoosayso 17-jirrada ayay ciyaartoydani ka tirsanaayeen, waxaana laga saaray liiska xulka dalkaas iyadoo sababtuna tahay been-abuur dhinaca da’da ah.
Xidhiidhka kubadda cagta Cameroon ayaa u yeedhay 44 ciyaartoy oo siddeed kooxood oo kala duwan u dheela, si loo dhegayso eedaymaha da’dooda, khiyaanooyin iyo been-abuur ay sameeyeen, waxaana arrintan lagu tilmaamay inay qayb ka tahay tallaabooyin uu madaxweyne Samuel Eto’o ku cidhib-tirayo dhibaatooyinka la xidhiidha da’da iyo been abuurka.
Eto’o oo ku mashquulsan arrintaas, ayaa waxa uu la kulmay jug weyn oo aanu filayn, waxaaana 17 ciyaartoy oo ka tirsan xulkiisa oo ka qaybgeli lahaa tartanka UNIFACC ee sannadkan ee dalalka badhtamaha Afrika, in laga ganaaxay markii baadhitaano MRI ah oo lagu sameeyey ay muujiyeen in da’doodu ka weyn tahay inta ay sheeganayaan.
Afrika ayaa waxa caan ka ah ciyaaartoyda da’dooda beenta ka sheegay. Sannadkii 2019 waxa Koobkii Adduunka ee 17-jirrada laga saaray xulka qaranka Guinea oo la ogaaday inay ciyaartoydu da’dooda ka been abuureen oo iyaga oo waaweyn ay sheegteen 17-jirro.
Sidoo kale, sannadkii 1989kii, FIFA ayaa tartamada oo dhan ka mamnuucday xulka qaranka Nigeria ee dhamaan da’da kala duwan, iyadoo la ogaaday in sannadkii 1988kii ay tartankii olombikada dheeleen ciyaartooyo da’doodu ka weyn tahay intii la ogolaa.
