Xiddiga Brazil ee Dani Alves ayaa maanta xabsiga loo taxaabay kaddib markii lagu eedeeyey inuu ku kacay kufsi gabadh yar oo ay ku kulmeen mid ka mid hotellada magaalada Barcelona kaddib markii uu kasoo laabtay Koobkii Adduunka ee lagu qabtay Qatar.
Booliska ayaa maanta gacanta ku dhigay Dani Alves oo uu ku socdo baadhitaan la xidhiidha kufsiga loo haysto oo dhacay December 31, sida ay sheegay wakaaladda wararka ee The Associated Press.
Sidii aanu shalay idiin soo gudbinay, Dani Alves ayaa looga yeedhay maxkamadda oo bixisay amarka ah in xabsiga la dhigo inta uu socdo baadhitaanka, mana jiro waqti loo qabtay in lagu soo gabogabaynayo baadhitaanka.
Booliska ayaa maxkamadda ka hor sheegay, in uu Dani Alves xoogay gabadh aan raalli ka ahayn oo uu ay ku kulmeen mid ka mid ah hotellada maqaalada xilli saqdhexe ah, isla markaana cabashada gabadhani ay soo gaadhay isla waqtigii uu falku dhacay.
Dani Alves oo 39 jir ah ayaa beeniyey inuu sameeyey falka lagu eedaynayo oo uu ku mutaysan karayo xadhig waqti dheer ah, waxaanay qareennadiisu diyaarinayaan sidii ay uga difaaci lahaayeen falkan lagu eedeeyey.
Ruug-caddaga Brazil ayaa ka mid ah ciyaartoyga ugu guulaha badan kubadda cagta, waxaana uu koobab waaweyn iyo horyaallo kula soo guuleystay toddoba kooxood oo ay ku jiraan Barcelona, Juventus iyo Paris Saint-Germain, haddana waxa uu u ciyaaraa kooxda reer Mexico ee Pumas.
