Karim Benzema ayaa maanta si dhab ah uga quustay inuu mar dambe xidhanayo garanka xulka qaranka Faransiiska ee uu bishii hore shaaciyey inuu ka fadhiistay, waxaana rajadii laga qabay inuu Karim dib ugu soo laaban karo ay soo dhamaatay markii maanta uu xidhiidhka kubadda cagta Faransiisku shaaciyey in heshiis cusub oo laba sannadood ah uu saxeexay tababare Didier Deschamps.
Benzema oo xulka Faransiiska uu ka caydhiyey Deschamps waxyar ka hor intii aanu bilaabmin Koobka Adduunka, ayaa waxa hadda soo baxday in qorshe bahdilaad ah uu marka horeba sii dejiyey Deschamps.
Xiddigan bishii November ku guuleystay abaal-marinta Ballon d’Or, ayaa dhaawac fudud oo soo gaadhay uu qiil ak dhigtay Deschamps, waxaana isaga oo kaliya saddex maalmood kusoo kaban karayay uu ku amray inuu gurigiisa ku laabto, sidaasna kaga diray xulka.
Wariyaha ciyaaraha ee Daniel Riolo oo ka tirsan telefishanka RMC Sports ayaa helay xogta qorshe uu marka horeba hoosta ku haystay Deschamps oo ahayd inuu bahdilo Karim Benzema.
Daniel Riolo ayaa waxa uu sheegay, in Deschamps aanu doonayn inuu Karim Benzema ku daro liiska xulkiisa ee Koobkii Adduunka, laakiin uu beddelay go’aankiisa markii uu laacibkani ku guuleystay abaal-marinta Ballon d’Or, si uu iskaga jeediyo indhaha taageereyaasha oo uu kala kulmi lahaa canaan badan.
“Benzema dhaawac fudud ayaa soo gaadhay ka hor Koobka Adduunka laakiin jidhkiisa ayuu garanayay inuu soo kabanayo, taasina dad ayay ka cadhaysiisay.” Ayuu yidhi Daniel Riolo oo ka hadlayay RMC Sports.
“Waxay ku qasbeen tababarka isaga oo aan diyaar u ahayn, isla markaana doonayn, waanu ku dhaawacmay. Wuu kusoo laaban karayay garoonka wareeggii 16-kaba, waxaanu u qalmayay ixtiraam intaa ka badan. Waxa se loola dhaqmay si anshaxa ka baxsan, waana la eryey.
“Ciyaartoyda qaarkood oo ay ku jiraan Lloris, Girezmann ama Giroud kuma aanay faraxsanayn inuu kaa tago xulka, waxaase jirtay xurguf u dhaxaysay. Aniga ilama aha in Deschamps uu marka horeba doonayay inuu Benzema kusoo daro xulka Faransiiska, laakiin waxa uu ugu soo daray si uu cadhada dadka uga badbaado, sababtoo ah waxa ku adag inuu xakameeyo falcelinta dadka.”
Halkan ka daawo wariye Daniel Riolo oo si Live ah uga hadlaya arrintan
🇫🇷🎙 Le point de vue de l’équipe de France sur les dessous de la fin de l’histoire entre Karim Benzema et les Bleus (Partie 1). #RMCLive pic.twitter.com/f2s7WS6nlq
— After Foot RMC (@AfterRMC) January 5, 2023
