PSG ayaa saf sharafeed iyo sacab ku soo dhaweysay xiddigooda Lionel Messi laakiin ciyaartoydii soo dhaweeyay waxaa ka maqnaa Kylian Mbappe kaasoo Messi uu ka qaaday koobka Adduunka ciyaartii finalka.
Messi ayaa labo gool dhaliyay finalka isagoo ka caawiyay inay rigoore ku badiyaan ka dib barbaro 3-3 ah oo ay labada xul isla dhaafi waayen. Laakiin waxaa abaalmarinta kabta dahabka ka qaaday Mbappe oo seddexleey dhaliyay kulankii finalka.
Messi ayaa maanta dib ugu soo laabtay tababarka PSG ka dib markii fasax dheer loo siiyay inuu u dabaaldego hanashadii Koobka Adduunka ee bishii la soo dhaafay.
Markii uu ku soo noqday xarunta kooxda waxaa u saftay ciyaartoyda kooxda oo sacab ku soo dhaweeyay laakiin waxaa ka maqnaa Kylian Mbappe iyo Achraf Hakimi.
Mbappe iyo saaxiibkiisa Hakimi ayaa labaduba waxaa fasaxay tababaraha PSG Christophe Galtier ka dib kulankii ay guuldarada ka soo gaartay Lens. Waxayna labada xiddig u safreen dalka Mareykanka halkaasoo ay ku soo daawadeen ciyaar kubada Kolayga ah.
Waxaase safka soo dhaweynta ku jiray Kylian Mbappe walaalkiis ka yar Ethan Mbappe kaasoo dhawaan ka mid noqday kooxda koowaad ee PSG waxayna kaamirada qabatay isagoo indhaha ku gubaya Messi.
