Inkastoo Cristiano Ronaldo laga soo reebay Koobka Adduunka hadana taasi lama micno ahan inuusan xiiseyneynin inuu ogaado kooxda loo caleemo saarayo Xulka Dunida oo ay ku tartamayaan France iyo Argentina.
Dad ayaa isweydiinaya xulka uu Cristiano Ronaldo la doonayo Koobka Adduunka.
Inkastoo ay caqligal tahay in lagu fekero inuu taageero xulka France madaama Argentina uu u ciyaaro ninka ay sida weyn u xafiiltamaan ee Lionel Messi, hadana xaqiiqdu sidaasi waa ka duwan tahay.
Waxaa baraha bulshada lagu wadaagayaa muuqaal uu Cristiano Ronaldo uga hadlo jaceyl uu u qabo Argentina iyo dadkeeda, sababtuna waa saaxiibtiis Georgina Rodriguez.
Gabadha caruurta u dhashay waxay heysataa dhalasho Argentine ah, sidaasi darteed xiddiga kabtanka Portugal uu xushmad weyn u hayaa wadanka ay ka soo jeedo.
“Saaxiibteey waxay u dhalatay Argentina. Dadka badinkiis ma oga laakiin bar waxay ka tahay Argentina barka kalana waxay ka tahay Isbaanish.” ayuu yiri Ronaldo.
“Aad ayaan u jeclahay Argentina, dadka badankiis waxay moodaan inaanan jecleyn, laakiin wax badan ayaan jeclahay Argentina”
Sidaasi darteed xiddigii hore ee Manchester United wuxuu maanta taageeri doonaa Argentina iyo Messi bedelkii uu taageeri lahaa Kylian Mbappe iyo France.
Ronaldo ayaa maalmihii la soo dhaafay tababar ku qaadanayay xarunta Real Madrid laakiin waxaa la sheegay inuu ka tagay haatan isagoo u duulay magaalada Dubai ee dalka Imaaraatka Carabta.
