Xiddiga reer Portugal ee Cristiano Ronaldo ayaan la arag meel uu jaan iyo cidhib-dhigay kaddib laba maalmood oo uu tababar ku qaatay garoonka Real Madrid ee Valdebebas, halkaas oo uu kusoo qaatay sannadihii uu ugu farxadda badnaa noloshiisa.
Ronaldo oo niyad-jab ka qaaday Koobka Adduunka oo uu kursiga kaydka la geliyey ka hor intii aanay ku hadhin wareegga siddeedda, sidoo kalena ay Manchester United burburisay heshiiskii ay kula jirtay bishii November, ayaa waxa uu hadda yahay koox la’aan.
37 jirkan oo dhowaan beeniyey in uu heshiis laa gaadhay kooxda reer Sucuudi Carabia ee Al Nassr, ayaa waxa la sheegay in uu hadda ku sugan yahay magaalada Dubai oo uu si qarsoodi ah ku tegay, halkaas oo uu doonayo inuu kaga nabad-galo saxaafadda dariiqyada u taagan ee su’aalaha ku miisaya.
Ronaldo ayaa la sheegay in uu magaalada Dubai usii dhaafi doono magaalada Riyadh ee waddanka Sucuudiga oo maalmaha soo socda uu ka degi doono, sida uu qoray wargeyska Marca ee kasoo baxa waddanka Spain, halkaasna uu ku saxeexi doono heshiis uu kaga mid noqonayo kooxda Al Nassr oo ka dhigi doonta ciyaartoyga ugu mushaharka badan dunida.
Marca waxa uu intaa ku daray, in kooxda xarunteedu tahay Riyadh ee Al Nassr ay sugayso inta uu Ronaldo soo gaadhayo Sucuudiga si ay ugu dhawaaqaan heshiis laba sannadood iyo badh ah oo sannadkiiba uu xiddigani ku qaadan doono mushahar gaadhaya 200 milyan oo Euro.
Ciidda masiixiga ayaa uu Ronaldo joogi doonaa magaalada Dubai, iyadoo toddobaadka dambena uu u duuli doono Sucuudiga si uu heshiiska ugu saxeexo Al Nassr.
Si kastaba ha ahaatee, Cristiano Ronaldo ayaan illaa hadda xaqiijin inuu tegayo kooxda reer Sucuudi Carabiya, sidoo kalena waxa arrintan ka aamusan wakiilkiisa, balse waa dookha ugu fiican ee uu haysto marka laga eego dhaqaalaha uu helayo iyo xaaladda uu ku jiro waqtigan.