Cristiano Ronaldo ayaa laga tirtiri doonaa buugga taariikhda Champions League kaddib markii uu u wareegay kooxda reer Sucuudi Carabiya ee Al Nassr oo uu u saxeexay heshiis laba sannadood iyo badh ah, waxaana arrintaas ka faa’iidaysan doona Lionel Messi oo doonaya inuu masaxo taariikh kasta oo uu Champions League ku lahaa Ronaldo.
CR7 ayaa markii ay Manchester United burburisay qandaraaskiisa waxa uu iskaga baxay kubadda cagta Yurub, waxaanu u saxeexay Al-Nassr oo uu sannadkii mushahar uga qaadan doono £173 milyan oo Gini. Laakiin taas beddelkeeda Lionel Messi ayaa xilli ciyaareed fiican la qaadanaya PSG waxaana uu rajaynay in uu kul guuleysto Champions League xilli ciyaareedkan.
Haddii uu Lionel Messi sannadkan ku guuleysto Champions League, waxay sinmi doonaan Cristiano Ronaldo oo ay noqon doonaan labada ciyaartoy ee ugu guulaha badan tartankan, laakiin Leo ayaa loo badinayaa inuu sannad kale u saxeexi doono PSG oo uu dhaafi karo Ronaldo.
Rikoodho badan oo Champions League ah oo Cristiano Ronaldo gaar u ah ayaa uu dhaafi doonaa Messi, waxaana uu sidaas kaga tirtiri doonaa rikoodhadan khaaska u ah xiddigan Portugal, waxaana rikoodhadaas ka mid ah:
Ciyaartoyga ugu safashada badan Champions League
Ronaldo waxa uu ciyaray 183 kulan oo Champions League ah, halka Lionel Messi uu illaa hadda dheelay 161 kulan. Xiddiga Argentina waxa uu xilli ciyaareedkan haystaa toddoba ciyaarood oo ay kooxdiisu socon karto illaa finalka, si uu usoo gaabiyo farqiga Ronaldo, isaga oo xilli ciyaareedka dambena dhaafi karaya.
Goolasha ugu badan ee Champions League
Cristiano Ronaldo ayaa ah ciyaartoyga ugu goolasha badan tartanka Champions League, waxaana uu dhaliyey 140 gool. Lionel Messi oo ah ciyaartoyga kaalinta labad ku jira ayaan wax badan ka hoosaynin, waxaana uu saxeexay 129 gool oo Champions League ah oo afar ka mid ah uu xilli ciyaareedkan socda saxeexay. Lionel Messi ayaa kaliya ka dambeeya Ronaldo 11 gool.
Goolashii ugu badnaa ee xil xilli-ciyaareed laga dhaliyo Champions League
Xilli-ciyaareedkii 2013-14 ayuu Cristiano Ronaldo dhaliyey 17 gool oo Champions League ah, waana laacibka ugu badan ee sidaa sameeyey.
Lionel Messi waxa uu rikoodhkiisa gool-dhalinta Champions League ee ugu fiican sameeyey xilli ciyaareedkii 2011-12 oo uu dhaliyey 14 gool. Waxa uu Messi fursad u haystaa inuu gaadho rikoodhka Ronaldo si uu meesha uga saaro taariikhdan lagu xasuusanayo laacibka Portugal.
Goolasha ugu badan ee wareegyada isreeb-reebka Koobka Adduunka
Laga bilaabo wareegga 16-ka illaa finalka Champions League, Ronaldo ayaa ka dhaliyey 67 gool, halka Lionel Messi uu saxeexay 49 gool. Waa tiro badan marka loo eego da’da Lionel Messi uu jiro iyo tirada goolasha oo ah 18 gool, balse 35 jirkan ayaa u muuqda in aanay wali da’du wax saamayn ah ku lahayn.
Ciyaartoyga ugu badan kabta dahabka Champions League
Toddoba jeer ayuu Cristiano Ronaldo noqday ciyaartoyga ugu goolasha badan tartanka Champions League, halka Lionel Messi uu lix jeer ku guuleystay kabta dahabka ee Champions League oo markiisii ugu dambaysay ay ahayd xilli-ciyaareedkii 2018-19.
Afar gool ayuu Messi xilli ciyaareedkan ka dhaliyey Champions League, balse waxa uumin saddex gool ka dambeeyaa Kylian Mbappe iyo Mohamed Salah oo min toddoba gool dhaliyey. Si uu usoo qabto Cristiano Ronaldo waa inuu dhaafo labadan ciyaartoy oo uu ku guuleysto kabta dahabka ah ee Champions League ee xilli ciyaareedkan.
Guulaha ugu badan Koobka Champions League
Ronaldo shan jeer ayuu ku guuleystay Champions League. Afar ka mid ah waxa uu la qaaday Real Madrid iyo hal mar oo Manchester United ah.
Lionel Messi ayaa isaguna afar jeer kula guuleystay Barcelon, hadda ayaanu markisii shanaad raadinayaa. Si uu taariikhdan uga tirtiro Ronaldo, waxa uu u baahan yahay laba koob oo Champions League ah inuu la qaado PSG.
Ciyaartoyga kaliya ee saddex final oo Champions League ah goolal ka dhaliya
Ronaldo waxa uu goolal ka dhaliyey final oo Champions League ah, laakiin Lionel Messi laba jeer oo final ah ayuu shabaqa soo taabtay. Labada gool ba waxa uu Messi ka dhaliyey Manchester United sannadihii 2009 iyo 2011.
Haddii uu xilli ciyaareedkan tago finalka oo uu gool dhaliyo, waxa uu barbarrayn doonaa Cristiano Ronaldo.
Waxa uu kamid yahay labada ciyaartoy ee kaliya ee dhamaan lixda ciyaarood ee Group-yada Champions League ka dhaliya goolal
Sebastien Haller iyo Cristiano Ronaldo ayaa ah labada ciyaartoy ee kaliya ee dhamaan kulamada hormooyinka Champions League shabaqa soo taabtay. Ma jiro ciyaartoy saddexaad. Lionel Messi afar gool ayuu ka dhaliyey saddex ciyaarood oo kala duwan oo group-yada aha xilli ciyaareedkan, waxaana la joojiyey labadii kulan ee Juventus.
Si uu usoo qabto Ronaldo iyo Haller, Lionel Messi waa inuu sugo xilli ciyaareedka dambe oo uu kooxaha wareegga group-yada goolal ka dhaliyo is-aragyada oo dhan.
Ciyaartoyga kaliya ee 11 kulan oo Champions League oo xidhiidh ah goolal ka dhaliyey
Ronaldo ayaa ah ciyaartoyga kaliya ee sameeyey 11 ciyaarood oo isku-xiga oo Champions League ah oo shabaqa lala saaxiibay. Lionel Messi kaliya shan ciyaarood oo xidhiidh ah ayaa uu goolal ka dhaliyey Champions League sannadihii 2014 iyo 2016.
