Ku biirista Cristiano Ronaldo ee kooxda Al Nassr ee dalka Sacuudiga ayaa kicisay shacuurta taageerayaasha wadankaas, waxaana marag ka ah sida loo soo dhaweeyay.
Saxiixa xiddiga reer Portugal ayaa si degdeg ah waxa uu sarre ugu qaaday magaca kooxda Al Nassr kuwaasoo barahooda bulshada ay heleen taageerayaal malaayiin ah markii uu Ronaldo ku biirau.
Laakiin weeraryahanka ayaa jabiyay rikoodhka daawashada markii ay Al Nassr u soo bandhigeysay taageerayaasheeda. Xaqiiqdiina waxaa dunida dacaladeeda daawaday dad ka badan intii daawatay finalkii Koobka Adduunka ee u dhaxeeyay France iyo Argentina.
Joornaaliistaha Pedro Sepuleda ayaa sheegay in soo bandhigistii Cristiano Ronaldo ee kooxda Al Nassr inay daawadaan 3 bilyan qof iyadoo laga baahiyay 40 kanaal oo dunida dacaladeeda ah.
Waxay tiradaas kor u dhaaftay tiradii daawatay finalkii Koobka Adduunka ee isla 40kaas kanaal, iyadoo Messi iyo Mbappe ay soo jiidan waayeen taageerayaal la mid ah inta uu soo jiitay kabtanka Portugal.
Inkastoo xiddiga Portugal ay iska fasaxday Manchester United, hadana waxaa weli qoorta u suran ganaax ay ku rideen xiriirka kubada cagta Ingariiska, isagoo garoomada laga ganaaxay labo kulan ka dib markii uu taleefan ka jabiyay wiil yar oo taageere u ahaa Everton.
Inkastoo uu wadan cusub iyo qaarad cusub tagay hadana sharciga FIFA ayaa dhigaya in ganaaxa loo wareejinayo horyaalka cusub ee uu ku biiray ee Saudi Pro League, waana sababta uusan Ronaldo weli u dheelin kulankiisii ugu horeysay ee kooxda Al Nassr.
