Cristiano Ronaldo ayaa lagu waramayaa inuu diiday inuu tababar la sameeyo maanta xiddigihii shalay kursiga keydka u fadhiyay Portugal, wuxuuna ku adkeystay inuu qolka jimicsiga la aado ciyaartoydii ku soo bilowday shaxdii shalay.
Tababare Fernando Santos ayaa keyd geliyay Ronaldo kulankii ay 6-1 kaga badiyeen Switzerland. Wuxuu ciyaarta bedel ku soo galay 15kii daqiiqo ee ugu danbeeyay, sidaasi darteed waxay aheyd inuu maanta qeyb ka noqdo tababarka ciyaartoydii kursiga keydka.
Laakiin sida ay sheegtay jariirada Isbaanishka ee Marca, xiddigii hore ee Manchester United ayaa diiday tababarkii maanta, wuxuu taas bedelkeeda ka doortay inuu qolka jimicsiga kula biiro xiddigihii shalay ku soo bilowday shaxda Portugal oo maanta soo kabsasho sameynaya.
Lama filaan ayay aheyd markii xarunta Portugal laga waayay Ronaldo oo ay aheyd inuu tababar la sameeyo ciyaartoydii keydka. Ma ahan dhaawac sidoo kalena ma jirto sabab uu qolka jimicsiga u aado.
Ronaldo ayaa diiday inuu qeyb ka noqdo ciyaartoyda keydka isagoo isku arka inuu weli yahay hogaamiyaha shaxda xulka Portugal.
Go’aankii uu tababare Santos keydka ku geliyay Ronaldo ayaa soo gabagabeysay 31 kulan uu xiddigii hore ee Real Madrid ku soo bilowday shaxda Portugal tartamada waa weyn taasoo ka soo bilaabaneysa Euro 2008.
Tababare Santos oo hogaaminaya Portugal tan iyo 2014kii ayaan la dhicin sida uu xiddigiisa uga falceliyay in la bedelay daqiiqadii 65aad ee kulankii ugu danbeeya wareega guruubyada Koobka Adduunka oo ay guuldarro 2-1 ka soo gaartay South Korea.
