Goolhayaha xulka Belgium iyo kooxda Real Madrid ee Thibaut Courtois ayaa xiddigaha dalkiisa si weyn ugu dhaliilay fashilkooda koobka aduunka oo ay wareega Group-yada kaga hadheen.
Xiddigaha loo yaqaanay “Jiilka Dahabiga Ah” ee Belgium ayaa ku hadhay Group ay la wadaageen Morocco, Croatia iyo Canada xilli inta koobku socday kala qaybsanaan iyo isku dhacyo badani dhexdooda ahaayeen.
Kaddib ceebta koobka aduunka, tababare Roberto Martinez ayaa gabi ahaanba iska casilay shaqada xulka kaddib tartano dhawr ah oo uusan wax koob ah uga keenin.
Courtois oo wax laga weydiiyay arrimaha xulkiisa ayaa sheegay inaysan ahayn in loogu waco jiilka dahabiga ah maadaama aysan waxba kusoo wada guuleysan.
Dhinaca kale goolhayaha Real Madrid ayaa sheegay inuu inta ka hadhay koobka taageerayo xulka qaranka Spain oo iyaga koobka la jecel yahay.
“Way adagtahay inaanu nafahayaga ugu wacno ‘Jiilka dahabiga ah’ marka aanad waxba ku guuleysan” ayuu Thibaut u sheegay Diario AS.
“Ma nihin jiil dahabi ah, waxaanu nahay jiil leh hibo badan iyo ciyaartoy cajiib ah oo Yurub daafaheeda ka kala yimid. Ruushka ayaanu kusoo muujinay inaanu nahay Belgium kubad fiican ciyaarta, koobka aduunka iyo Euro 2020 maanu ahayn nafahayaga, waa wax laga xishoodo”.
“Haatan waxaan taageerayaa Spain iyaga ayaanan guul u rajaynayaa inta ka hadhay Qatar”.
