Xulka qaranka Costa Rica ayaa guushii koowaad ee Koobka Adduunka soo hooyey, waxaanay 1-0 ku garaaceen Japan oo ay ka hor istaageen fursad ay ugu gudbi lahayd wareegga 16ka, taas oo murug hor leh gelisay grouyp-ka E.
Costa Rica oo ciyaarteedii koowaad uu xulka Spain ku xasuuqay toddoba gool, ayaa waxay ceebta iskaga maydhay Japan oo iyaguna kulankoodii koowaad guul soo laabasho ah ka gaadhay Jarmalka, taas oo ka dhigan in saddex waddan oo group-kan ah ay haystaan min saddex dhibcood.
Gool uu dhamaadka ciyaarta oo sagaal daqiiqadood ka hadhsan tahay u dhaliyey Keysher Fuller Spence ayaa Costa Rica siiyey guushan oo aanay dad badan filayn, waxaase geesigooda noqday goolhaye Keylor Navas oo bandhig heersare ah sameeyey. 
Japan oo haddii ay ciyaartan badin lahaayeen u gudbi lahaa wareegga xiga ayaa waxay iska lumiyeen fursado badan iyaga oo dhamaadkiina uu goolhaye Keylor Navas ka qabtay kubbad halis badnayd oo laba jeer lagu toogtay goolkiisa.
Asano ayaa kubbad ay isku diibeen Morita waxa dedaal badan geliyey Navas oo uga dhaartay shabaqiisa, laba daqiiqadood kaddibna mar kale ayuu Endo dabad uu ku toogtay goolka Costa Rica waxa soo celiyey Navas balse Asano oo madax ku celiyey ayaa barita dhinaca mariyey.
Daqiiqaddii 81aad ayay Costa Rica dhalisay goolka kaliya ee ciyaarta ka dhashay ee guusha siiyey. Kubbad uu khadka dhexe ka keenay Tajeda ayaa waxa uu u diibay Fuller oo ku dhax maamulay dhawr difaac, kaddibna lugta bidix ku toogtay oo ka dul-qaaday goolhaye Gonda oo soo baxsanaa.
Dhamaadka ciyaarta oo ay laba daqiiqadood ka hadhsan yihiin ayay Japan heleen fursad fiican oo ay gool u beddeli karayeen. Kubbad uu Mitoma ku qabtay goolka ayaa waxa badbaadiyey Navas, waxaanay ciyaartu sidaas ugu soo dhamaatay 1-0 ay guushu ku raacday Costa Rica.
Labadan waddan ayaa haysta min saddex dhibcood, waxase ku wehelinaya Spain oo iyaduna saddex dhibcood leh oo Jarmalka la ciyaaraysa caawa, waxaana haddii ay isbaanishku badiyaan ay u gudbi doonaan wareegga xiga ee 16ka, halka Jarmalku ay fursad ka heleen natiijada Costa Rica iyo Japan oo sababaysa inay illaa ciyaarta ugu dambaysa dagaallamaan.
