Kooxda kubadda cagta Chelsea ayaa go’aan ka gaadhay tababaraheeda Graham Potter oo saddex bilood oo kaliya xilka hayay, kaddib markii uu awoodi waayey in uu kooxda ka saaro dhibaatada ay ku jirto oo ay hoos ugu dhaceen kaalinta siddeedaad ee miiska kala-sarraynta Premier League.
Potter ayaa bishii September beddelay Thomas Tuchel oo shaqada laga caydhiyey, waxaana sagaalkiisii ciyaarood ee ugu horreeyey ee Stamford Bridge ay Chelsea ahayd mid aan laga badin, hase yeeshee bishii October ayay bilaabeen inay simbiririxdaan.
Kooxaha reer London ee Birghton iyo Arsenal ayaa garaacay, sidoo kalena Manchester City ayaa ka reebtay tartanka Carabao Cup, halka Newcastle United ay kusii istagtay oo ay u ridday kaalinta siddeedaad ka hor intii aan loo bixin Koobka Adduunka.
Salaasada berri ayay Chelsea la ciyaari doontaa Bournemouth, waxaana laga doonayaa tababare Graham Potter in uu kooxda kusoo celiyo dariiqa guusha si ay uga badbaadaan inay hoos ugu sii dhacaan kaalmaha sagaalaad iyo tobnaad oo ay midkood u degi doonaan haddii laga badiyo.
Si kastaba, maamulka Chelsea ayaa go’aan ka gaadhay tababaraha culayska badan saaran yahay ee Graham Potter, waxaanay ku wargeliyeen in aan laga eryi doonin shaqada oo uu badqab yahay xaalad kasta oo ay kooxdu gasho.
Arrintan oo la rumaysan yahay in kalsoonida loogu dhisayo maadaama uu yahay tababare khibrad badan u leh horyaalka Premier League oo isku soo muujiyey Brighton oo ay kasoo kaxaysteen ayaa waxa uu Todd Boehly u sheegay in shaqadiisu ammaan tahay oo aan la eryi doonin.
