Kooxda kubadda cagta Chelsea ayaa ixtiraam-darro iyo dulmi isku raacisay goolhayaha reer Senegal ee Edouard Mendy taas oo keentay inuu laacibkani iska diido heshiis cusub oo lix sannadood ahaa oo ay Blues u bandhigtay, si uu cimrigiisa ciyaareed ugu dhamaysto Stamford Bridge.
Goolhaye Mendy ayaa tababarka kusoo laabtay toddobaadkii hore kaddib markii uu xulkiisa Senegal wareegga 16ka kaga hadhay Koobka Adduunka, laakiin calaamadaha muuqda ma saxeexi doono qandaraas cusub oo kusii haynaya Chelsea.
Mendy oo 30 jir ah ayaa toddobaadkii mushahar uga qaata Chelsea £100,000 Gini, waana mushahar aad u hooseeya marka la barbar-dhigo ciyaartoyda kale, gaar ahaan goolhayaha kaydka mushaharka ku qaata ee Kepa Arrizabalaga oo xilli ciyaareedkan uu boodhka kasoo jafay tababare Graham Potter oo dookhiisa koowaad ka dhigtay.
Sida uu qoray wargeyska The Sun, Mendy ayaa u sheegay Chelsea in aanu saxeexayn heshiis cusub haddii aan mushaharkiisa la gaadhsiinin inta uu qaato Kepa oo laba-jibbaar ka badan, balse jawaabta uu kooxda ka helay ayaa ah in aanay marnaba siin doonin lacag gaadhsiisan inta Kepa Arrizabalaga.
“Edouard wuu kusoo laabtay Chelsea waxaanu diyaar u yahay in uu ciyaaro, laakiin waxa uu dareensan yahay in xaaladda qandaraaskiisu aanay dhinacna u socon.” Sidaas waxa The Sun u sheegay qof ka tirsan Chelsea oo magaciisa la qariyey.
“Edouard koobab waaweyn ayuu kula guuleystay Chelsea, laakiin waxa jira dareen ah in aanay kooxdu siinayn ixtiraam ku filan marka laga hadlayo heshiiska cusub.” Ayuu ku daray qofka magaciisa la qariyey.
Kooxo badan oo reer Yurub ah ayaa si dhow ula socda xaaladda goolhaye Mendy oo sannadkii 2021 noqday goolhayaha ugu fiican dunida kaddib markii uu Blues la qaaday Champions League, sidoo kalena waddankiisa Senegal kula guuleystay Koobka Qaramada Afrika.
