Kabtanka kooxda kubadda cagta Chelsea ee Cesar Azpilicueta ayaa markii ugu horreysay sharraxaad buuxda ka bixiyey sababtii uu iskaga diiday inuu ku biiro Barcelona oo xagaagii isku dayday inay la saxeexato, taas oo xataa gaadhay heer uu tababaraheeda Xavi Hernandez telefoonka kala soo hadlo Azpilicueta.
32 jirkan oo qandaraaskiisa Chelsea uu ku egyahay dhamaadka xilli ciyaareedkan, ayaa wali ay raadinaysaa Barcelona balse waxa hadda iyaduna kusoo biirtay tartankiisa Real Madrid, halka Chelsea ay doonayso inay sii haysato.
Cesar Azpilicueta ayaa waxa uu sheegay in uu telefoon ka helay Xavi oo uu u sharraxay qorshihiisa ciyaareed iyo fursadda uu siinayo si uu qaab xor ah ugula wareego, laakiin uu Cesar Azpilicueta doortay inuu sii joogo Stamford Bridge oo uu sannad heshiis ah saxeexo.
Blues oo xagaagii ay si xor ah uga tageen Antonio Rudiger oo u wareegay Real Madrid iyo Andreas Christensen oo ka degay Barcelona, sidoo kalena uu Marcos Alonso waqti dambe isaguna u saxeexay Barcelona, ayaa waxa Cesar Azpilicueta uu qaatay go’aan ah in aanu raacin raadka ciyaartoydan oo uu sii joogo kooxda uu kabtanka u yahay.
Waraysi uu siiyey wargeyska AS ee kasoo baxa waddanka Spain isaga oo ku sugan waddanka Qatar oo uu xulka dalkiisa Spain kagala qayb-gelayo Koobka Adduunka, ayaa waxa Cesar Azpilicueta uu ku sheegay in sababto qoyskiisa la xidhiidha uu u tegi waayey Barcelona oo uu fursad ka helay xagaagii.
“Chelsea waxa aan u ciyaaray in ka yar 30 kulan, waxaanan mar horeba noqday ciyaartoy xor ah.” Ayuu Cesar Azpilicueta ku bilaabay, waxaanu sii raaciyey: “Aniga waligay iguma dhicin arrintan oo kale, laakiin mulkiileyaal cusub ayaa yimid waxaanay ii muujiyeen doonistooda ah in aan sii joogo kooxda.”
Azpilicueta oo sannadkii 2010 ka tegay waddankiisa Spain oo ku biiray Marseille oo laba sannadood markii uu u ciyaaray uu usii dhaafay Chelsea oo ku iibsatay £7 milyan oo Gini, ayaa uu sharraxay sababaha qoys ee keenay inuu iska diido Barcelona, waxaanu yidhi: “London waa gurigaygii, carruurtayduna waxay si fiican ugu hadlaan English-ka marka loo eego luuqadda Spanish-ka. Markii aan go’aanka gaadhay, waxa aan u malaynayay in Xavi uu i fahmay. Haddii wax walba caddaan yihiin, way ku fahmayaan.”
