Xulka qaranka Faransiiska ayaa ceeb weyn kala kulmay finalkii Koobka Adduunka ee ay Argentina rikoodheyaasha kaga qaadday. 45 daqiiqadood oo ka mid ah ciyaarta ayaa si weyn ay taageereyaashu uga niyad-jabeen xulka Faransiiska, iyadoo ay soo baxday qaladkii uu Deschamps ka galay Karim Benzema ee uu kaga caydhiyey xulkiisa.
Argentina ayaa si aad ah uga awood badnayd Faransiiska qaybtii hore, waxaanay la yimaaddeen laba gool iyaga oo xiddigaha Faransiiskana loo diiday in ay xataa hal mar kubadda ula dhowaadaan goolka Argentina. Waa sababta uu Deschamps daqiiqaddii 40aad u beddelay Olivier Giroud iyo Ousmane Dembele.
Lionel Messi iyo Angel di Maria ayaa ku raaxaysanayay garoonkaa Lusail Stadium, iyadoo uu kabtanka xulka Argentina laba jeer shabaqa taabtay, waxaanay taasi u buuxisay tirada 20 gool oo Koobka Adduunka ah oo uu ku lug yeeshay, taas oo ka dhigaysa ciyaartoygii ugu badnaa ee 20 gool oo dhalin iyo caawin iskugu jira ka sameeya Koobka Adduunka tan iyo sannadkii 1966kii.
Ceebta ka dhacday garoonka ee bannaanka keentay sida ay Faransiisku ugu jabeen Karim Benzema ayaa ahayd in qaybtii hore aanay xataa hal mar kubadda ku taabanin diilinta 18aad ee goolka Argentina horteeda, mana jirin ciyaartoy ka tirsan xulka difaacanayay Koobka Adduunka oo kubbad lasoo galay amaba ku taabtay xerada ganaaxa.
Marcus Thuram iyo Kolo Muani oo daqiiqaddii 41aad soo galay ciyaarta ayaa isbeddel ku sameeyey xulka qaranka France oo dib usoo nooleeyey qaybta dambe, laakiin ma aanay ahayn kuwo si fiican u shaqaynaya illaa ay garoonka soo gelayeen Kingsley Coman iyo Eduardo Camavingta.
0 – France failed to attempt a shot or register a touch in the opposition box in the first half. Zéro. pic.twitter.com/jfyuvJOzxv
— OptaJoe (@OptaJoe) December 18, 2022
Taageereyaasha Faransiiska ayaa qaybtii hore falcelin ka sameeyey sida ay kooxdoodu u burbursan tahay, waxaanay eedaynayeen Olivier Giroud oo aan xataa kubadda taaban oo iska taagnaa iyo Deschamps oo ay ku canaanayeen sababtii uu ugu yeedhi waayey Benzema.
