Khabiirka kubadda cagta England ahna xiddigii hore ee Liverpool ee Jamie Redknapp ayaa aaminsan in Man United lagu qaldamay kulankii ay xalay barbardhaca 1-1 ah la gadhay Crystal Palace oo ay Selhurst Park marti ugu ahayd.
Bruno Fernandes ayaa dhammaadkii qaybtii hore hoggaan 1-0 ah u dhiibay Manchester balse Michael Olise ayaa Red Devils daqiiqadii 91-aad wadnaha ku jaray laad xor ah oo uu shabaqa David De Gea dhex dhigay.
Red Devils ayaa isha ku hayay guul ay kala laabtaan magaalada London iyo booska labaad oo ay kusii fadhiistaan balse waxa daqiiqado kahor dhammaadka ciyaarta riyadaas kala kiciyay Olise.
Dhirbaaxada kale ee Manchester ka gaadhay ciyaartaas ayaa ahayd in burburiyaha khadka dhexe ee Casemiro uu kaadh jaale ah qaatay sidaasna ku seegayo ciyaarta muhiimka ah ee ay Arsenal booqanayaan Axada.
Redknapp ayaa qaba in Man United ay ahayd in rigoore loo dhigo daqiiqadii 71aad ee ciyaarta kaddib qalad uu daafaca dhexe ee Omar Richards ku galay Scott McTominay.
Taas ayaa ka dhignaan lahayd in Man United hoggaanka 2-0 ku qaban karto isla markaana tababare Erik Ten Hag deg-deg u bedelo Casemiro si uu uga badbaado kaadhka.
“Shaqsiyan waxaan filayaa inuu wax cad oo muuqda yahay, waa xirfad qurxoon oo McTominay sameeyay, wuu khiyamay, inuu qalad ku galo ayuu sugay isaguna (Richards) ma taaban kubadda”.
“Haddii rigooraha la dhigo taasi waxay noqon kartay 2-0 iyo Casemiro oo diyaar u ah kulanka Axada, wuxuu ahaa rigoore”.
