Xulka qaranka Cameroon ayaa guul-darro ku bilowday Koobka Adduunka, waxaana 1-0 kaga adkaaday dhiggooda Switzerland taas oo ka dhigan in dalalka Afrika ku metelaya Koobka Adduunka aanay illaa hadda wax guul ah gaadhin.
Breel Embolo oo u dhashay Cameroon laakiin u ciyaarayay xulka qaranka Switzerland ayaa dhaliyey goolka kaliya ee kulanka, iyadoo waddankiisa dhabta ah uu guul-darro xanuun badan u xambaariyey.
Ciyaartan oo labada xul ay taxadar badan samaynayeen, isla markaana fursadaha la kala helay koobnaayeen, ayaa uu Breel Embolo goolka ku aftaxay bilowga qaybta labaad isaga oo dhamaystiray baas qurux badan oo uu xerada ganaaxa ugu soo dhiibay Xherdan Shaqiri, hase yeeshee waxa uu Breel Embolo iska diiday inuu u dabbaal-dego goolkaas.
Cameroon ayaa qaybtii hore heshay fursado fiican iyaga oo dhawr jeer weerarro rogaal-celis degdeg ahaa ku ekeeyey goolka Switzerland, waxaase la degay Mbeumo oo fursaddii ugu fiicnayd ee ay heleen ka klumiyey, kaddib markii kubbad uu ka helay xerada ganaaxa oo uu u dhiibi karayay Choupo-Moting uu go’aansaday inuu goolka ku toogto.
Goolhayaha Switzerland ee Sommer ayaa sidoo kale badbaadiyey kubbad uu Hongla dhamaadka qaybta hore ula timid oo gool loo qaatay, ka hor intii aanay Akanji iyo Vargas khasaarinin kubbado goolal loo qaatay.
Markii lagu soo noqday qaybta labaad ee ay saddex daqiiqadood oo kaliya socotay ayay Switzerland hoggaanka ciyaarta qabatay, waxaana kubbad uu Shaqiri kasoo dhiibay dhinaca midig gool u beddelay Embolo oo afka qabsaday, isaga oo muujinaya sida uu uga xun yahay inuu waddankiisa gool ka dhaliyo, inkasta oo uu kasoo horjeeday oo uu u ciyaarayay Switzerland.
Goolhaye Onana ayaa fursad cajiib ahayd ka dafiray Xhaqiri oo bannaanka kaga toogtay laad hoose, halka waqtigii dheeraadka ahaa ee lagu daray ciyaartana uu Castelletto noqday shimbirka Cameroon kala baxsaday gool labaad, iyadoo uu isku dhigay kubbad uu Stevovic la yimid goolka hortiisa oo uu darbad xooggan ku toogtay.
Ciyaarta ayaa kusoo dhamaatay 1-0 ay guushu ku raacday Switzerland oo yeelatay saddex dhibcood iyaga oo hoggaanka u qabtay group G oo ay ku wehelinayaan Brazil iyo Serbia oo caawa wada ciyaaraya.