Kooxda kubadda cagta Liverpool ayaa isbeddel ku samaysay qorshaheeda ku aaddan xiddiga khadka dhexe ee Naby Keita oo ay hore iskugu dayaysay inay heshiis cusub ka saxeexdo, si uu usii joogo Anfield iyadoo heshiiskiisu ku egyahay dhamaadka xilli ciyaareedkan socda.
Liverpool ayaa joojisay wada-hadalladii ay kula jirtay laacibkan, kaddib markii ay isku afgaran waayeen shuruudaha uu laacibkani ku xidhay saxeexa qandaraas cusub, waxaana Jurgen Klopp iyo maamulka Reds ay go’aan ku gaadheen inay faraha ka laabtaan wada-hadalka oo ay u ogolaadaan Keita inuu si xor ah ku tago.
Kubbad-sameeyahan dhaawacu daashaday oo sannadkii 2018 ay kasoo iibsadeen RB Salzburg, ayaa waxa waqtigii ay Liverpool iibsatay waxa uu noqday ciyaartoygii ugu qaalisanaa taariikhda kooxda, waxaana garanka No.8 ku wareejiyey Steven Gerrard oo ku tilmaamay inuu booskiisii u buuxin doono kooxda.
Sida uu xaqiijiyey wariyaha ee Fabrizio Romano, Naby Keita oo kasoo kabanaya dhaawac uu qaybtii hore ee xilli ciyaareedkan u jiifay ayaa waxa uu bisha January xor u noqon doonaa inuu la xaajoodo kooxda uu doono, iyadoo Jurgen Klopp uu quus ka istaagay.
“Liverpool waxay doonaysaa inay la saxeexato ciyaartooyo khadka dhexe ah, sababtoo ah waxa la ii sheegay inuu ka tegayo Oxlade-Chamberlain dhamaadka xilli ciyaareedka. Waxa kale oo jirta fursad aad u sarraysa oo Naby Keita uu si xor ah ugaga tegayo.” Ayuu yidhi Fabrizio Romano.
Ka sokow Naby Keita, waxa kale oo Liverpool si xor ah uga tegi doona xiddiga khadka dhexe ee Oxlade-Chamberlain oo qandaraaskiisu ku egyahay dhamaadka xilli ciyaareedkan socda.
