Tababaraha kooxda Manchester City ee Pep Guardiola ayaa mulkiilaha Chelsea ee Todd Boehly kala taliyay arrimaha macalinka kooxdiisa ee Graham Potter oo wakhti adag ku jira.
City ayaa maalmo gudahood laba guulood kaga gaadhay Chelsea halka xilli ciyaareedka ilaa haatan ay ka gaadhay saddex guulood oo ay laba kamid ah FA Cup iyo Carabao Cup kaga reebtay isla markaana mida kale saddexda dhibcood ee horyaalka ka qaadatay.
Guushaas xalay ee 4-0 ka ahayd ayaa ah mid sii qasaysa xaalada Chelsea oo horyaalkana booska tobbnaad kaga jirta kala sarreynta.
Taageerayaasha Chelsea ayaa xalay Etihad Stadium ku heesayay magacyada mulkiilihii hore ee kooxda ee Roman Abramovich iyo tababarihii Potter ka horreeyay ee Thomas Tuchel.
Si kastaba, Guardiola oo saxaafada farriin uga diray Boehly kulankaas xalay kaddib ayaa kula taliyay inuu wakhti siiyo tababaraha English-ka ah.
“Waxaan Todd Boehly ku odhan lahaa, wakhti sii isaga. Waan ogahay kooxaha waaweyn in natiijooyinku muhiim u yihiin balse waxaan odhan lahaa wakhti sii” ayuu yidhi Pep.
“Qaybtii dambe ee kulanka ayaa ah waxa uu yahay, waxa uu ka sameeyay Brighton waa cajiib balse wakhti ayaynu u baahanahay xilli ciyaareedka koowaad, anigu Messi ayaan haystay xilli ciyaareedkaygii koowaad ee Barcelona oo laba xilli ciyaareed uma baahan sababtoo ah Messi ayaa halkaas joogay”.
