Khadka dhexe ee kooxda Manchester City ee Bernardo Silva ayaa shaaca ka qaaday dareenka xiddigaha xulkooda Portugal ee waraysigii uu Cristiano Ronaldo dhawaan ku jarjaray kooxdiisa Man United.
Ronaldo iyo Silva ayuu xifaaltan kaga dhaxeeyaa heer kooxeed balse labaduba muhiim u ah Portugal isla markaana lagu wadaa inay qayb muhiim ah ka ciyaaraan Koobk aduunka.
Si kastaba, waraysiga uu Ronaldo siiyay saxafi Piers Morgan ayaa hadal hayn badan dhaliyay iyadoo ay jiraan warar sheegaya inay Red Devils kansalayaan heshiiskiisa.
Bernardo Silva oo ka hadlayay shirka jaraa’id ee xulkiisa Portugal ayaa sheegay in warka ka imanaya England uusan gabi ahaanba wax saamayn ah iyaga ku yeelan.
“Warka ka imanaya England waxba kagama xidhna Selecao (xulka Portugal), aniga ima qusayso, waxay qusaysaa Ronaldo” ayuu yidhi Silva.
Portugal ayaa kulankooda koowaad ee Koobka aduunka la ballansan xulka Ghana oo ay wada ciyaari doonaan Khamiista.
