Inkastoo xulka England ay ku soo fashilmeen Koobka Adduunka hadana ugu yaraan waxaa Qatar kala yimaadeen bisad.
Waxay ku riyoonayeen inay Koobka Adduunka boorsada ku soo ritaan marka ay dalkooda ku laabanayaan laakiin riyadaas waxaa soo afjartay France, bedelkii Koobka Adduunka waxay la soo degeen bisad ay u bixiyeen Dave.
Laacibiinta England Kyle Walker iyo John Stones ayaa la saaxiibay bisadaan oo banaan joog aheyd iyagoo kula kulmay huteelkii ay ka deganaayeen Qatar ee Al Wakrah.
Waxay bilaabeen inay quudiyaan bilowgii Koobka Adduunka, waxay xitaa u xireen maaliyada England.
Kyle Walker ayaa balanqaaday inuu xanaaneysan doono bisadaan haddii England ay ku guuleysato Koobka Adduunka, laakiin madaama taas la soo afjaray shalay, xiddiga Man City ayaa go’aansaday inuu isku sabarsiiyo bisada.
Bisadaan loo bixiyay Dave ayaa shalay laga kaxeeyay huteelka iyadoo loo qaaday dhakhtarka xaywaanada si loo siiyo taalaalada looga baahan yahay UK.
Waxaa ka dib loo dhoofin doonaa Ingariiska halkaasoo muddo afar bilood ah karantiil la gelin doono ka hor inta aan lagu wareejinin Kyle Walker.
