Xiddigii hore ee khadka dhexe ee xulka qaranka Germany iyo Bayern Munich ee Bastian Schweinsteiger ayaa shaaciyey labada ciyaartoy ee uu ugu jecel yahay Manchester United oo muddo laba sannadood ah uu u ciyaaray markii uu ka tegay Bayern Munich.
Bastian Schweinsteiger oo ka mid ah ciyaartoyda koobabka ugu badan ku guuleystay, ayaa waxa u diiwaangashan siddeed horyaal oo Bundesliga ah iyo Champions League uu kula guuleystay Bayern Munich, halka xulka qarankiisa Germany uu sannadkii 2014 la qaaday Koobkii Adduunka ee lagu qabtay Brazil.
Schweinsteiger oo waraysi siinayay website-ka Manchester United, ayaa la weydiiyey su’aal ahayd labada ciyaartoy ee uu ugu jecel yahay ee hadda u ciyaara Manchester United, waxaana uu markiiba lasoo booday kubbad-burburiyaha reer Brazil ee Casemiro iyo khadka dhexe ee Portugal ee Bruno Fernandes.
“Bruno waxa aan ugu yeedhaa ‘maskaxda'” ayaa uu yidhi Bastian Schweinsteiger, waxaana uu sii raaciyey: “Sida uu u dhaqaaqo garoonka dhaxdiisa ayaa cajiib ah, haddana waa nooca ciyaartoyda aan la siinin qiimaynta ay leeyihiin.
“Dabcan, waxa uu sameeyaa caawin ama dhalin, waxaanu bixinayaa baasas wanaagsan, laakiin sidoo kale Bruno Fernandes waa ciyaartoy aad u shaqo badan.”
Bastian Schweinsteiger waxa uu sidoo kale sharraxay Casemiro oo ah ciyaartoyga labaad ee uu ugu jecel yahay Old Trafford, waxaanu yidhi: ‘Casemiro waxa uu ka mid yahay ciyaartoyda ugu wanaagsan booskiisa waqtigan.
“Waxa uu sida u fiican u joojiyaa khatarta kusoo socota kooxdiisa, waana ciyartoy ku wanaagsan dhiibista kubadda. Waxa uu dhaliyey gool cajiib ah ciyaartii Switzerland ee Koobka Adduunka, sidoo kalena waxa uu ahaa ciyaartoy aad muhiim ugu ah kubbadaha madaxa xulka qaranka Brazil.
“Waxa uu ka mid yahay hoggaamiyeyaasha halkaa jooga, waanad arki karaysaan oo aad dareemi krayaan. Waxa aan rajaynayaa in uu dib usoo celin doono ciyaartii Manchester United.”
