Kooxda kubadda cagta Barcelona ayaa doonaysa in ay xiddigeeda khadka dhexe ee Gavi ka beddesho lambarka uu xidho kaddib bixitaankii Memphis Depay, laakiin waxay marka hore ogolaansho diiwaangelineed weydiisan doonaan horyaalka Spain ee LaLiga.
Gavi oo heshiis cusub oo waqti dheer ah u saxeexay Barcelona horraantii xilli ciyaareedkan ayaan wali ka mid ahayn kooxda koowaad ee Barcelona, waxaana uu ugu diiwaangashan yahay da’yarta, maadaama uu ka buuxsamay liiska mushaharka laga ogol yahay kooxda koowaad iyo tirada ciyaartoyda oo dhaaftay intii diiwaangelinta loo ogolaa.
Sida ay ku warramayso idaacadda Cope ee xarunteedu tahay waddanka Spain, Barcelona ayaa rajaynaysa in horyaalka LaLiga uu u ogolaan doono in Gavi loogu diiwaangeliyo koioxda kooxdas, waxaanay taasi ka caawin doontaa in laga beddelo lambarka uu xidhan yahay waqtigan.
Xavi Hernandez ayaa u qorsheeyey da’yarkan in uu dhaxlo lambarkii uu xidhan jiray ee No.6 marka diiwaangelintiisa loo ogolaado, waxaana fursad u noqonaysa bixitaankii Memphis Depay oo liiska kooxda koowaad lagaga dari doono halkii uu weeraryahanka ee u wareegay Atletico Madrid uu ka baxay.
Barca ayaa sidoo kale ka shaqaynaysa in ay heshiis cusub ka saxeexdo laacibkeeda da’da yar ee Alejandro Balde, kaas oo doonaya in si weyn sare loogu qaado mushaharkiisa.
