Kooxda kubadda cagta Barcelona ayaa lagu soo warramayaa inay qarka u saaran tahay heshiis ay la gaadho xiddiga khadka dhexe uga ciyaara kooxda Wolverhampton Wanderers ee Ruben Neves oo uu tababare Xavi Hernandez doonayo inuu u noqdo beddelka Sergio Busquets oo dhamaadka xilli ciyaareedkan uu ku egyahay qandaraaskiisa Camp Nou.
Xiddiga reer Portugal oo ay Wolves sannadkii 2017 kala soo wareegtay FC Porto ayaa u ciyaaray 233 kulan oo dhamaan tartamada ah oo uu u dhaliyey 28 gool iyo 12 kale oo uu caawiye ka noqday, waxaana hadda uu kusoo baxay bartilmaameedka koowaad ee Barcelona.
Sida uu ku warramayo wargeyska Sport, Barcelona si weyn ayay u doonaysaa in ay gacanta ku dhigto Neves, waxaanay kula jiraan wada-hadallo meel fiican maraya oo Xavi uu doonayo in laga midho dhaliyo bishan January.
Qorshaha Barcelona ayaa ah in ay Wolves iskugu darto lacag iyo ciyaartoy si ay qiimaha Ruben Neves hoos ugu dhigto maadaama ay dhaqaale la’aan ka cabanayaan.
Warka ayaa intaa ku daray, in Barcelona ay kala dooransiinayso Wolves labada ciyaartoy ee Franck Kessie iyo Nico Gonzalez, midka ay doortaanna loo raaciyo lacag aan wali la shaacin caddadeeda.
Wolves ayaa la rumaysan yahay in ay soo dhoweyn doonto dalabka Barcelona, sababtoo ah heshiiska ay kula jirto Ruben Neves ayaa ku eg badhtamaha sannadka 2024, waxaana haddii ay iibin waayaan bishan January ama dhamaadka xilli ciyaareedka uu uga tegi doonaa si xor ah sannad kaddib.
