Barcelona ayaa ahayd koox waxbadani ka dhex dhacayeen suuqyadan ugu dambeeyay sababo la xidhiidha xaalada dhaqaale ee adag ee ay ku jirto oo qasbaysay inay waxyaabo badan ku kacdo, markale ayay u furan yihiin qorshayaasha ah inay go’aamo lama filaan ah qaataan.
Sida uu sheegayo wargeyska Sport, Barca oo isku diyaarinaysa suuqyada soo socda ayaa dooratay kaliya lix xiddig oo kooxdeeda ah oo ay u aragto kuwo lama taabtaan ah oo aysan dalabaadka laga soo gudbiyo dhagaysan doonin.
Xiddigahaas ayay kamid yihiin labadii saxeex ee xagaagii ee weeraryahan Robert Lewandowski iyo daafaca dhexe ee Jules Kounde.
Lewandowski ayaa ah saxeexa ugu saamaynta batay ee ay Barca xagaagii samaysay isagoo durba goolal badan dhaliyay halka Kounde ay in badan oo maamulka kooxda kamid ahi u arkaan daafacooda ugu muhiimsan.
Si lamid ah daafaca kale ee Ronald Araujo oo dhawaan saxeexay heshiis kordhin ilaa 2026 ah, Araujo oo dhawaanahan dhaawacyo ku maqnaa ayaa haddii uu taam ahaansho buuxa helo ballanqaadaya waayo ciyaareed oo fiican.
Waxa soo raaca laba da’yar khad dhexe ee Pedri Gonzalez iyo Pablo Gavi oo kamid ahaa xiddigaha kooxda ugu fiican sanadkii ugu dambeeyay, Gavi iyo Pedri oo mustaqbalka fog ee Barca loo arko ayaa saxeexay heshiisyo ilaa 2026 ah.
Magaca ugu dambeeya ee liiska Barca ayaa ah Ansumane Fati oo qandaraas weyn saxeexay 2020 balse intii ka dambaysay dhaawacyo xidhiidh ah la darsay.
Waxa jirta durba cabsi laga qabo in dhaawacaasi galaafto mustaqbalkiisa kubaddeed waxaana intaas u dheer inuusan xilli ciyaareedkan wakhti badan ka helin tababare Xavi.
